काठमाडौँ । नेपालको मुख्य व्यापारिक घरानामध्येमा पर्ने ज्योति समूहका सदस्य डा रुप ज्योतिलाई ठगी मुद्दामा प्रहरीले पक्राउ गरेको छ । 

 

सिंगापुरबाट काठमाडौँ आउने क्रममा त्रिभुवन विमानस्थलबाट बाहिर निस्कँदै गर्दा व्यवसायी ज्योति पक्राउ परेका हुन् । उनलाई करिब दुई करोड रुपैयाँ ठगी गरेको आरोपमा अदालतमा मुद्दा परेको थियो ।

 

डा रुप ज्योति पूर्व अर्थराज्यमन्त्री पनि हुन् । विश्व प्रसिद्ध हवार्ड विश्वविद्यालयवाट पीएचडी गरेका डा ज्योति बौद्धिक व्यवसायीका रुपमा परिचित थिए । व्यावसायिक घरानाबाट आए पनि पञ्चालयतकालदेखि नै उनले राजनीतिमा चासो राख्दै आएका थिए । पूर्वराजा ज्ञानेन्द्रको प्रत्यक्ष शासनकालमा डा ज्योति अर्थराज्यमन्त्री भएका थिए ।

 

नेपालमा चर्चित ध्यान केन्द्र विपश्यनाको स्थापना पनि डा ज्योतिले नै गरेका हुन् । यो अहिले बिस्तारको क्रममा छ ।

 

भद्र र चर्चित व्यापारिक घरनाका डा ज्योतिलाई विमानस्थलमा गरिएको पक्राउप्रति भने निजी क्षेत्रका कैयौँ उद्यमी व्यवसायीले असन्तुष्टि व्यक्त गरेका छन् ।

 

निजी क्षेत्रका उद्यमी र व्यवसायीबीच चिसो सम्बन्ध भइरहेका बेला डा ज्योतिको पक्राउले निजी क्षेत्र झनै संशंकित बनेको छ ।

 

विशेष गरी अर्थमन्त्री डा युवराज खतिवडाप्रति उद्यमी व्यवासायीको चरम असन्तुष्टि छ । अदालतको आदेशअनुसार  डा ज्योतिलाई पक्राउ गरिएको बताइए पनि प्रहरीले भने के कारणले उनलाई नियन्त्रणमा लिइएको हो सार्वजनिक गरेको छैन ।

 

केही समय यता उद्यमी व्यवसायीमाथि प्रहरी प्रशासनले धरपकड वढाएको छ । सामान्य गल्तीमा समेत निजी क्षेत्रलाई दुःख दिने गरिएको छ ।

 

केही समयअघि सुन तस्करीमा आरोपित एक व्यवसायीको सेकुवा व्यवसायमा नै सिलबन्दी गरिएको थियो ।