हिमालयखवर संवाददाता-

अमेरिका । अमेरिकाको इमिग्रेसन एण्ड कस्टमस् इन्र्फोसमेण्ट (आईसीई)ले अमेरिका वाट गैरकानुनी अप्रावासीलाई फिर्ता पठाउन आइतवार देखि धरपकड गर्ने तयारी गरेपछि कागजात विहिनहरुमा त्रास फैलिएको छ ।

 

अमेरिकाका विभिन्न १० वटा मुख्य शहरमा केन्द्रित रही धरपकड गर्ने योजना यस अघि २ साताका लागिपर सारिएको थियो । यही योजना आइतवार वाट शुरु हुन लागेको हो । आईसीईले धरपकड गर्ने योजना वनाएका प्रमुख शहरमा नेपाली समुदायको वसाई पनि  उल्लेख्य छ । त्यसैले कागजात नभएका नेपाली पनि समस्यामा पर्न सक्छन् ।

 

अहिलको धरपकड अदालतले देश फिर्ता आदेश दिएर पनि नगएका, अपराधमा संलग्न भएकालाई हटाउन गरिएको ह्वाइट हासउले जनाएको छ । यस्तो भनिए पनि यो अभियानमा गैरकानुनी रुपमा वस्दै आएको जो कोही पनि पर्न सक्ने जोखिम पनि रहेको छ ।

 

कयौं ठाउं नियमित ट्राफिक जांचका क्रममा समेत इमिग्रेसन सम्वन्धि कागजात माग्ने गरिएको समाचार आएका छन् । यसले गर्दा परिवारसग अमेरिकामा वस्दै आएका तर, अपराधको कुनै रकेर्ड नभएका कयौं कागजात विहिनहरुमा त्रास फैलिएको हो । यसले कागजात विहिनहरु घरवाट वाहिर निस्कन समेत डराएका छन् ।

 

धरपकडको क्रममा अदालतले फर्किने आदेश जारी नगरेका र अपराधको रेकर्ड नभएकापनि कागजात विहिन जो कोही पनि पर्न सक्ने जनाईएको छ । यसका लागि आईसीईले होमल्याण्ड सेक्यूरिटीज, स्थानिय प्रशासन, लगायतको सहयोग लिनेपनि जनाईएको छ । हिरासतमा परेकालाई राख्ने, फिर्ता पठाउन प्रकृया थाल्ने सम्वन्धमा पनि आईसीईले तयारी गरेको जनाईएको छ ।

 

राष्ट्रपति डोनाल्ड ट्रम्पले केही साता अघि ठुलो संख्या करिव १० लाख गैरकानुनी आप्रावासी अमेरिकावाट हटाउन अभियान शुरु गर्ने घोषणा गरेका थिए  । तर, विपक्षी पार्टी डेमोक्रयाट्को विरोधले यो अभियान पर सरेको थियो ।

 

गत फ्रेबअरी महिनामा मात्र आईसीईले २ हजार लाई अमेरिका छाड्न अन्तिम चेतावनी पत्र पठाएको थियो । आईसीईको अपरेशन कहिले सम्म जारी रहन्छ यो वताईएको छैन  । तर, केही दिनसम्म चल्ने र हाललाई २ हजार व्यक्तिलाई फिर्ता पठाइने सम्वद्ध अधिकारीलाई उदृत गर्दै सीएनएनले जनाएको छ ।

 

अहिलेको धरपकड मुख्य रुपमा मुख्य दश शहर एटलान्टा, बास्टिमोर, सिकागो, डेभर, ह्यूस्टन, एलएञ्जलस, मियामी, न्यूओरल्यान्स, न्यूयोर्क र सन फ्रान्सिस्सकोमा केन्द्रित हुने छ । यही नेपालीको अत्याधिक बसाई रहेको शहर हुन् ।

 

नेपालीलाई कति असर पर्ला ?

 

गैरकानुनी रुपमा अमेरिका वस्ने नेपालीको संख्याकेही हजार मात्र छ । करिव ९ हजारले टीपीएस लिएकाले समस्या पर्दैन । तर, आउट अफ स्टाट्स भएका विद्यार्थीलाई भने चेकजांचमा पर्दा समस्या हुने छ ।

 

केही सय नेपालीहरुलाई अदालतले फिर्ताको आदेश दिएको भएपनि गएका छैनन । यस्ता नेपाली पनि हिरासतमा पर्न सक्छन् ।

 

कुनै कारण अमेरिका आएका तर, यहां स्थायी रुपमा वस्न पाउनका लागि प्रकृया शूरु नगरेका केही सय नेपालीलाई पनि असर पर्न सक्छ ।

 

यसरी कागजात विहिन रुपमा वसेका जो केही आईसीईको जांचमा परियो भने नआत्तिकन, कानुनी उपचार उपाय खोज्न विज्ञहरुले सल्लाह दिएका छन् ।

 

कागजात विहिन हुदैंमा आईसीईले फिर्ता पठाउन सक्दैन । अदालतले आदेश दिनु पर्छ ।  अपराधको कुनै रेकर्ड छैन तर, कानुनी रुपमा वस्नेकुनै कागजात छैन र आईसीईको जांचमा परियो भने धेरै नबोल्ने, कानुनी उपचारका लागि सहयोगी खोज्नु उपयुक्त हुन्छ ।

 

राष्ट्रपति ट्रम्प प्रशासनमा इमिग्रेशन मुद्दा धेरै चर्चामा रहेपनि यस अघिको ओबामा प्रशासनको तुलनामा आईसीईले पक्राउ गरेर फिर्ता पठाएको सख्या भने कम छ । अमेरिकाको आर्थिक बर्ष २०१८ मा २ लाख २६ हजार ११९ लाई घर फिर्ता पठाईएको थियो । जवकी सन् २०१७ मा २ लाख ५६ हजार ८५ लाई अमेरिकावाट फिर्ता पठाईएको थियो ।

 

सन् २०१२ मा ओबामा प्रशासनले ४ लाख भन्दा वढीलाई देश फिर्ता पठाएको थियो ।

 

राष्ट्रपति ट्रम्पको पहिलो वर्षमा १ लाख ९ हजार अपराधिक पृष्ठभूमीका र ४६ हजार यस्ता पृष्ठभुमी नभएका पक्राउन परेको थिए । तस्बिर: सामाजिक संजाल