हिमालयखबर संबाददादा- 

ड्यालस (टेक्सस) । संख्यात्मक हिसाब गर्ने हो भने ड्यालसमा दुई दर्जन जति नेपाली सामाजीक संघसंस्थाहरु छन् । तर संघसंस्थाले आयोजना गर्नुपर्ने खालको एउटा अतिनै रचनात्मक कार्य भने एकजना व्यबसायीले गरेर सबैको आकर्षणको केन्द्र बनेका छन् ।

 

विगत १२ वर्षदेखि ड्यालसमा रहेर एकाउन्टिङ पेशा अँगाल्दै ‘मम टुगो’ क्याफे समेत सञ्चालन गर्दै आएका प्रदीप गिरीले वृद्ध बा–आमाहरुलाई मनोरञ्जन गराउनका पिकनिक आयोजना गर्दैछन् । ‘नेपालबाट यहाँ रहेका छोराछोरी, नाती–नातिनाहरुलाई भेट्न आएका बा–आमाहरुलाई एकै ठाउँमा भेटघाट गराउने, रमाइलो गराउने र उहाँहरुका अनुभव कुरा सुन्नका लागि यो पिकनिक आयोजना गर्न लागेको हुँ,’ गिरीले हिमालय खबरसँग भने । 

 

नेपालबाट आएका बा–आमाहरुलाई हरेक आइतबार नियमित रुपमा अर्भिङको नेपाली मन्दिरमा भेट्दा आफुलाई उहाँहरुका निम्ति यस्तो कार्यक्रम गर्न पाए हुन्थ्यो भन्ने मनमा आएको समेत उनले बताए । त्यसै अनुसार आउँदो अप्रिल १३ तारिक शनिबार ग्रेपभाइन तालको किनारमा पिकनिक आयोजना गर्न लागिएको उनले बताए ।

 

‘यो पिकनिक निशुल्क हो, यसमा बा–आमाहरुका लागि रमाइला खेलकुका साथै सहभागीलाई उपहार समेत दिएर उहाँहरुले सधैँ सम्झिरहने खालको बनाउने सोचमा छौँ,’ उनले भने । मम टुगोको तर्फबाट आयोजना गर्न लागिएको यो पिकनिकलाई सानो रुपमा आयोजना गर्ने सोचमा धेरैतिरबाट सकारात्मक प्रतिकृया आएपछि भव्य र ठूलो रुपमा आयोजना गर्न लागिएको छ । 

 

पिकनिक ग्रेपभाइन लेकको रकलेज पार्कमा आयोजना हुनेछ । यो पार्कमा तीनसय जना अटाउने क्षमता छ । ‘हामी त्यो दिन त्यही खाना बनाएर खान्छौँ, बा–आमालाई रमाइलो गराउँछौ,’ उनले भने । पिकनिकमा सहभागी हुनका लागि अनलाइन फर्म भरिदिन समेत उनले आग्रह गरेका छन् ।

 

‘तपाई हाम्रा छिमेकका कोही नेपालबाट आउनुभएका बा–आमा हुनुहुन्छ भने कृपया खबर गरिदिनुहोला र फर्म भरेर सहभागी हुन सहयोग गरिदिनुहोला,’ उनले अनुरोध गरे । 

 

यस्तो खालको पिकनिकले नेपालबाट आउनुभएका बा–आमाहरुबीच एकआपसमा जिनजान हुने, दुःख सुखका कुराकानी गर्न मिल्ने, अनुभव साटासाट समेत हुने भएकोले निकै फलदायी र रमाइलो हुने आशा गरिएको छ । पिकनिक पुरै शाकाहारी हुनेछ । 

 

पिकनिकमा सहभागी हुन भर्नुपर्ने फर्मः फर्मको लागि यहाँ क्लिक्क गर्नुहोला