काठमाडौं । अन्तर्राष्ट्रिय टि–२० क्रिकेटमा नेपालले अर्को इतिहास रचेको छ । विश्वकप टि–ट्वान्टी खेलेर इतिहास बनाएको नेपालले पहिलोपटक टि–२० सिरिज जितेर अर्को इतिहास बनाएको हो ।
युएईविरुद्धको तीन टि–२० सिरिज नेपालले २–१ ले जित्दै इतिहास रचेको हो । आज भएको सिरिजको निर्णायक तथा अन्तिम खेलमा नेपालले युएईलाई १४ रनले पराजित गर्यो ।
१०५ रनको लक्ष्य पछ्याएको युएईलाई ९०/८ रनमा रोक्ने क्रममा नेपालका ललित नारायण राजवंशी, करन केसी र अविनाश बोहराले समान २/२, सन्दीप लामिछाने र सोमपाल कामीले समान एक–एक विकेट लिए । युएइका लागि सैमन अनवारले ३०, घुलम सब्बरले २५ रन बनाए ।
यसअघि वर्षाले प्रभावित खेलमा टस हारेर पहिले व्याटिङ गर्दै नेपालले ८ विकेटको क्षतिमा १०४ रन बनाएको थियो । वर्षाले ढिलो भएको खेल १० ओभरमा छोट्याइएको थियो ।
नेपालका लागि कप्तान पारस खड्काले १४ बलमा २९ रन, सन्दीप जोराले ११ बलमा २८ रन, विनोद भण्डारीले १३ बलमा २१ रन, करन केसीले ५ बलमा १० रन, ज्ञानेन्द्र मल्लले ९ बलमा ११ रन बनाए भने ओपनर पवन सराफ खाता नखोल्दै आउट भए ।
तीन खेलको सिरिजको पहिलो खेलमा नेपाल २१ रनले पराजित भएको थियो भने दोस्रो खेलमा नेपाल ४ विकेटले विजयी भएको थियो ।
प्रतिक्रिया