काठमाडौँ । नेदरल्यान्ड्ससँग एक दिवसीय अन्तर्राष्ट्रिय क्रिकेट सिरिज खेलेको नेपाली क्रिकेट टिम स्वदेश फिर्ता भएको छ ।
टिम नेपाल सोमबार बिहान काठमाडौं आइपुगेको हो । नेदरल्यान्ड्ससँग ऐतिहासिक २ खेलको एक दिवसीय अन्तर्राष्ट्रिय क्रिकेट सिरिज खेलको थियो । जसमा नेपालले नेदरल्यान्ड्ससँग सिरिज १–१ को बराबरीमा टुंग्याएको थियो ।
पहिलो खेलमा ५५ रनले पराजित भएको नेपालले अन्तिम तथा दोस्रो खेलमा १ रनको सनसनीपूर्ण जित निकालेको थियो । नेपालले नेदरल्यान्ड्ससँग एक दिवसीय क्रिकेट सिरिज खेल्नुभन्दा अघि नेदरल्यान्ड्स र एमसीसीसँग इंग्ल्यान्डमा त्रिकोणात्मक टि–ट्वान्टी क्रिकेट सिरिज खेलेको थियो ।
नेपाली टिमका कप्तान पारस खड्काले त्रिभूवन विमानस्थलमा पत्रकारहरुसँग कुरा गर्दै पहिलो एकदिवसीय क्रिकेट नेपालको लागि ऐतिहासिक भएको उल्लेख गरे ।
उनले आगामी दिनमा नेपालले धेरै खेल्न बाँकी रहेको बताउँदै अझै पनि सोचेअनुसारको खेल खेल्न नसकेको प्रतिक्रिया दिए । “पहिलो ओडीआई ऐतिहासिक भयो,” उनले भने, “आगामी दिनमा नेपालले धेरै म्याच खेल्नेछ । आफ्नो देशको लागि खेल्दा हरेकपल्ट देशलाई जिताउने प्रयास भइरहेको हुन्छ ।तर खेलमा कहिले जित र कहिले हार त अवश्य हुन्छ ।”
उनले अब आफूहरुको ध्यान एसिया कप छनोटमा केन्द्रित हुने पनि बताए । “महत्वपूर्ण खेलमा जित हासिल गर्यौं । पहिलो खेलमा ब्याट्सम्यान चल्न नसक्दा हामी चुक्न पुगेका थियौं । यही महिनामा एसिया कपको छनोट खेल हुँदैछ । अब हाम्रो ध्यान त्यता केन्द्रित हुनेछ,” कप्तान पारसले भने ।
प्रतिक्रिया