काठमाडौँ । ३३ किलो सुन तस्करी प्रकरणका मुख्य आरोपी एवम् सनम शाक्यको हत्याका मुख्य योजनाकार चूडामणि उप्रेती ‘गोरे’ पक्राउ परेका छन् ।
भारतको नयाँदिल्लीमा लुकेर रहेको अवस्थामा पक्राउ परेका भनिएका गोरेलाई काठमाडौँको गौरीघाटबाट प्रक्राउ गरिएको प्रहरीले जनाएको छ । गृहमन्त्रालयको विशेष छानबिन समितिअन्तर्गत खटिएको प्रहरीको टोलीले गोरेलाई पक्राउ गरेको हो ।
गत माघमा यूएईबाट आएको ३३ किलो सुन एयरपोर्टबाट बाहिरिएलगत्तै गायब भएपछि गोरेले आफ्ना पूर्वसहयोगी सनम शाक्यको फागुन १८ मा हत्या गरेको आरोप प्रहरीको छ । हत्या आरोपपश्चात फरार रहेका गोरेलाई रेडकर्नर नोटिस जारी गरेर खोजी गरेको थियो ।
सुन प्रकरणमा ६३ जनाविरुद्ध मोरङ जिल्ला अदालतमा मुद्दा दायर भएको थियो । ३२ जनालाई पक्राउ परिसकेका छन् भने ३१ जना फरार सूचीमा रहेका छन् । यस प्रकरणमा नौ प्रहरी अधिकारीसमेत पक्राउ परिसकेका छन् ।
जिल्ला न्यायाधिवक्ताको कार्यालयले गत बुधबार सुन तस्करीविरुद्ध १७ अर्ब १ करोड ८० लाख ७१ हजार ४ सय १३ रुपैयाँ ९० पैसा बिगो माग दाबी गर्दै मुद्दा दर्ता गरेको छ । उनीहरुविरुद्ध जिल्ला अदालतमा आपराधिक समूह स्थापना र सञ्चालन गरी सुनको अवैध कारोबार गरेको, अपहरण तथा शरीर बन्धक र कर्तब्य ज्यान मुद्दा दर्ता भएको छ ।
खासमा को हुन् त गोरे ?
गोरे भनिने चूडामणि उप्रेती केही वर्षअघिदेखि प्रहरीका उच्च अधिकारीदेखि हाइप्रोफाइल व्यापारीहरूसँगको साँठगाँठमा सुन तस्करीको सञ्जाल फैलाइरहेका एक व्यक्ति हुन् ।
सरकारले ३३ किलो सुन तस्करी र सनम शाक्य हत्यासम्बन्धी छानबिन गर्न गृहमन्त्रालयका सहसचिव ईश्वराज पौडेलको नेतृत्वमा समिति गठन गरेको थियो । सो समितिले पक्राउ परेका व्यक्तिहरूबाट बरामद प्रमाण एवं फरार रहेका अभियुक्तहरूबीचको आर्थिक कारोबारका आधारमा गोरे तथा उनका सहयोगीहरूले बितेको पाँच वर्षमा ४२१ पटक गरी ३ हजार ७९९ किलो ५९ ग्राम सुन नेपाल ल्याएको तथ्य फेला पारेको थियो ।
पाँच वर्षयता तस्करीमार्फत ल्याइएको सुनको नेपाली बजारमूल्य १७ अर्ब १ करोड ८० लाख ७१ हजार ४ सय ३१ रुपैयाँ हुन्छ । सरकारले गोरेसहित विभिन्न ६३ प्रतिवादीविरुद्ध १७ अर्ब १ करोड ८० लाख रकम बिगो दाबीसहित जिल्ला अदालत मोरङमा मुद्दा दायर गरेको छ ।
उक्त गिरोहविरुद्ध आपराधिक समूह स्थापना, सुन चोरी निकासीको अवैध करोबार, अपहरण, शरीर बन्धक र कर्तव्य ज्यानअन्तर्गत मुद्दा दायर गरिएको हो ।
यस अवधिमा ३७ क्विन्टलभन्दा बढी तस्करीको सुन ल्याउने योजनाका मुख्य नाइके भनिएका गोरेविरुद्ध नेपाल प्रहरीले इन्टरपोलको सहयोगमा ‘डिफ्युजन नोटिस’ जारी गरेर अन्तर्राष्ट्रिय प्रहरीको खोजीको सूचीमा राखेको थियो । नेपाल प्रहरीका पूर्वअसई नेत्र उप्रेतीका जेठा छोरा हुन् ‘गोरे’ । उनी ‘रुपेश’ नामले समेत चिनिन्छन् ।
मोरङको साविक इटहरा तथा हाल रतुवामाई नगरपालिकाबाट २०५० सालतिर उर्लाबारी बसाइँ सरेपछि स्थानीय सरस्वती माविमा भर्ना भएका थिए । गोरेले बीचैमा पढाइ छोडेर भारतीय सेनामा चार वर्षसम्म जागिर खाए ।
भारतीय सेनाको जागिर छाडेर उनीे वैदेशिक रोजगारीका लागि दुबई गए । सामान्य आर्थिक हैसियतका गोरे विदेश गएर फर्किएपछि काठमाडांैको गौरीघाटमा बस्न थालेका हुन् । वैदेशिक रोजगारीबाट पैसा कमाएर आर्थिक हैसियत फेरिएको ठानिएका गोरेको आर्थिक समृद्धिको रहस्य भने अहिले आएर रहस्योदघाटन भएको छ ।
दुबई गएलगत्तै उनको भेटघाट सुन तस्करहरूसँग भएको थियो । सुन तस्करीको भरियाका रूपमा प्रवेश गरेका गोरे त्यसपछि सुनको अवैध कारोबारमा संलग्न भए । उनी आफ्ना भाइ रमेश उप्रेतीलाई दुबईमा राखेर आफू नेपालमै रहेर कारोबार विस्तार गर्न सक्रिय भए ।
पाँच वर्ष दुबई बसेर सुन पठाउने र हुन्डीको समेत कारोबार गर्ने धन्दामा संलग्न भएका गोरे नेपाल फर्किएर दुबई, सिंगापुर, थाइल्यान्डलगायतका देशबाट पठाइएका सुनको व्यवस्थापन गर्ने धन्दामा सक्रिय रहे ।
प्रहरीका अनुसार दुबईमा गोरेले नेपाली होटल तथा रेस्टुराँसमेत सञ्चालन गर्दै आएको प्रहरी अनुसन्धानमा देखिएको छ । सुन तस्करीमार्फत सम्पत्ति कमाएपछि गोरेले आफना बुबा नेत्र तथा आमा बिनादेवीलाई पनि काठमाडौँमै स्थानान्तरण गराएका थिए ।
गोेरेले राजनीतिक दलका व्यक्तिसँग पनि निकट सम्बन्ध बढाएका थिए । स्थानीय चुनावमा पनि मनग्गे पैसा खर्च गर्ने गरेको र उर्लाबारीका केही नेतालाई चुनावमा खुलेरै सहयोग गरेको स्थानीयले जनाएका छन् ।
पछिल्लो समय भारतीय व्यापारीसम्म व्यापारिक सम्बन्ध कायम गरेका गोरेले त्रिभुवन विमानस्थलका कर्मचारीदेखि प्रहरीसम्म प्रक्रिया मिलाएर सुन तस्करी गदैृ आएको प्रहरीको अनुसन्धानमा खेलेको छ । गोरेको पक्राउसँगै सुन तस्करीमा जोडिएका नेतादेखि उच्च प्रहरीसम्मको पर्दाफास हुने संभावना बढेको छ ।
प्रतिक्रिया