हिमालय खबर संबाददाता
ड्यालस (टेक्सस) – नेपाली साहित्यका साधक महानन्द सापकोटाको एकसय २२ औं जन्मदिवसका अवसरमा आइतबार ड्यालसमा साहित्यीक कार्यक्रमको आयोजना गरियो ।
अन्तर्राष्ट्रिय नेपाली साहित्य समाज ड्यालस शाखाको आयोजनामा भएको कार्यक्रममा सापकोटाकै स्मृतिमा स्थापना गरिएको ‘महानन्द सापकोटा साधक पुरस्कार’ गीतकार किरण खरेललाई प्रदान गर्ने घोषणा भएको छ । ड्यालसको अर्भिङस्थित नेपाली मन्दिरमा आयोजित विशेष साहित्यीक कार्यक्रमबीच पाँचसय डलर राशीको उक्त पुरस्कार नेपाली गीत/संगीत क्षेत्रका अथक साधक खरेललाई प्रदान गर्ने घोषणा साहित्यकार भीम कार्कीले गरेका थिए ।
ड्यालस क्षेत्रमा रहेका साहित्यानुरागीहरु, स्व. सापकोटाका परिवारका सदस्यहरुबीच आयोजित कार्यक्रममा एक दर्जन कवि–कवयित्रीहरुले कविता वाचन गरेका थिए । त्यस अवसरमा उत्तम लामिछाने, लिला श्रेष्ठ, गोपाल भण्डारी, प्रकाशकुमार पाण्डे, श्रेया पोखरेल, राधाकृष्ण काफ्ले, सुरेश पोखरेल, निर्मला राई, बासु अधिकारी, अच्युतहरि रिजाल, पातलो अन्तरे र बलायर प्रत्याशी लगायतले कविता प्रस्तुत गरेका थिए ।
साहित्यकार शैलेश आचार्यको प्रमुख आतिथ्यतामा भएको कार्यक्रममा स्व. साधक सापकोटाका बारेमा कपिल अधिकारी र सापकोटाका पनाती तथा महानन्द गुठीका सुमिरन सापकोटाले प्रकाश पारेका थिए ।
अन्तर्राष्ट्रिय नेपाली साहित्य समाज ड्यालस शाखाका अध्यक्ष बाशु शर्माको सभापतित्वमा भएको सो कार्यक्रमको सञ्चालन सुमन कार्कीले गरेका थिए।
प्रतिक्रिया