काठमाडौँ । एकदिवसीय मान्यता प्राप्त गरी नेपाल फर्किएको नेपाली क्रिकेट टोलीलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ । जिम्बावेमा आयोजित आईसीसी विश्वकप छनोट क्रिकेटमा सहभागिता जनाएर नेपाली राष्ट्रिय क्रिकेट टोली सोमबार स्वदेश फर्किएको हो ।
त्रिभुवन अन्तर्राष्ट्रिय विमानस्थलमा नवनियुक्त युवा तथा खेलकुदमन्त्री जगतबहादुर सुनुवार विश्वकर्मासहित खेलकुद मन्त्रालयका पदाधिकारी तथा क्रिकेटप्रेमीलगायतले सो टोलीलाई भव्य स्वागत गरेका थिए ।
जिम्बाब्वेमा सम्पन्न आइसिसी विश्वकप छनोट प्रतियोगितामा नेपालले प्लेअफ खेलमा पपुवा न्यूगिनीलाई पराजित गर्दै पहिलो पटक आगामी चार वर्षका लागि एक दिवसीय मान्यता प्राप्त गरेको थियो ।
नेपालको विश्वकप खेल्ने सपना सकिएसँगै सातौँ स्थानका लागि भएको प्लेअफ खेलमा नेपालले पपुवा न्युगिनीलाई ६ विकेटले पराजित र अर्को खेलमा नेदरल्यान्ड्सले हङकङलाई हराएपछि नेपालले एक दिवसीय मान्यता पाउने पक्का भएको थियो ।
कूल १० राष्ट्र सहभागी विश्वकप छनोटमा नेपाल आठौं स्थान हासिल गर्न सफल भएको छ । नेपालले आईसीसीबाट अस्थायी रुपमा एकदिवसीय राष्ट्रको मान्यता प्राप्त गर्दै ऐतिहासिक सफलता पाएको थियो ।
नेपालले आईसीसीबाट सन् २०२२ सम्मको लागि एकदिवसीय मान्यता पाएको हो । यो नेपाली क्रिकेटको २२ वर्षे क्रिकेट यात्रामा सबैभन्दा ठूलो सफलता हो । एसोसियट राष्ट्रको मान्यता पाएको २२ बर्षपछि नेपालले पहिलोपटक एकदिवसीय मान्यता प्राप्त गरेको हो ।
नेपालले प्रतियोगितामा आईसीसीबाट सी ग्रेड प्राप्त गरेको थियो । छनोटको सुपर सिक्स पुग्न असफल नेपालले समूह चरणमा ३ खेलमा हार बेहोरेको थियो भने एक खेलमा जित हात पारेको थियो ।
पहिलो खेलमा आयोजक जिम्बावेसँग ११६ रनले पराजित भएको नेपाल दोस्रो खेलमा स्कटल्याण्डसँग ४ विकेटले पराजित भएको थियो । तेस्रो खेलमा अफगानिस्तानसँग ६ विकेटले पराजित भएको नेपाल समूह चरणको अन्तिम खेलमा हङकङमाथि ५ विकेटको जित दर्ता गराएको थियो ।
यस्तै, नेपालले प्लेअफमा पपुवा न्युगिनीलाई ६ विकेटले पराजित गर्दै एक दिवसीय मान्यता पाएको थियो । तर, नेपाल सातौँ स्थानको लागि भएको खेलमा नेपाल नेदरल्याण्डसँग मात्र ४५ रनले पराजित भएको थियो । तस्बिर : रासस
प्रतिक्रिया