भूपेन्द्र न्यौपाने / हिमालयखवर संवाददाता
टेक्सस(अमेरिका)- रंगहरुको पर्वका रुपमा परिचित होलीलाई अमेरिकाको ड्यालसमा नेपाली संघसंस्थाहरुले भव्य रुपमा मनाएका छन् ।
ड्यालस र सेरोफेरोमा शनिबार होलीका चारवटा कार्यक्रमहरु भएका छन् । नेपाली समाज टेक्ससको आयोजनाका ग्रेपभाइन लेक, युलेसको नेपाली कम्युनिटीको आयोजनामा युलेस, रमाइलो रेष्टुरेन्टको आयोजनामा बियरक्रिक पार्क र मधेशी समाजको आयोजनामा अर्भिङमा होलीका कार्यक्रमहरु भएका थिए ।
सबै कार्यक्रममा नेपालीहरुको उल्लेख्य सहभागिता थियो । विगतका वर्षहरुमा होली कार्यक्रम एकै थलोमा हुने गरेकोमा यस पटक विभाजित जस्तो देखिएपनि सहभागिता भने निकै उत्साहप्रद थियो ।
नेपाली समुदायका व्यक्तिहरु होलीका सबै कार्यक्रमहरुमा सहभागी हुने प्रयासमा थिए । अर्को वर्षदेखि होलीको कार्यक्रम सबै संघसंस्थाहरु मिलेर एकै थलोमा आयोजना गर्नुपर्ने आवाज उठेको छ ।
नेपाली समाज टेक्ससको होली कार्यक्रममा सहभागी हुन एनआरएन अमेरिकाका अध्यक्ष डा. केशव पौडेल समेत न्यूमेक्सिकोबाट आएका थिए ।
प्रवासमा रहेर पनि होलीको पर्व मनाउन पाउँदा निकै रमाइलो महसुस भएको सहभागीहरुको प्रतिकृया थियो ।
प्रतिक्रिया