टेक्सस(अमेरिका)- टेक्सस राज्यमा रहेका नेपालीको सामाजिक संस्था नेपाली समाज टेक्सस (एनएसटी)मा उपाध्यक्ष, कोषाध्यक्ष लगायत अन्य केही कार्यसमिति पद निर्विरोध भएको छ । तर, अध्यक्ष, महासचिव लगायतमा पदमा भने निर्वाचन हुने भएको छ ।
उम्मेदवारी फिर्ता लिने अन्तिम दिन सोमवार अध्यक्ष पदमा निवेदन दिएका दीवस थापाले नाम फिर्ता लिएका छन् । थापाले उपाध्यक्ष पदमा पनि मनोनयन दर्ता गरेका थिए । अध्यक्षमा फिर्ता लिई उपाध्यक्षमा उनी निर्विरोध चयन भएका हुन् ।
कोषाध्यक्षमा अमित शर्मा निर्विरोध चयन भएका हुन् I एनएसटीको महिला संयोजकमा अायशा अोझा र युवा तथा विद्यार्थी संयोजक पदमा बिमला श्रध्दा श्रेष्ठ भने निर्विरोध भइसकेको छ।
एनएसटीको निर्वाचन आउने शनिवार हुदैंछ । यो निर्वाचनले एनएसटीको १७ सदस्य कार्यसमिति चयन गर्ने छ।
उम्मेदवार फिर्ता लिने अन्तिम समय सोमवार सकिएको हो । अध्यक्षमा कमल सापकोटा र सुमन थापाले उम्मेदवारी दिएका छन् । सापकोटा वर्तमान कार्यसमितिका उपाध्यक्ष हुन् । सुमन सहकोषाध्यक्ष हुन् ।
टेक्ससमा करिब ५० हजार नेपाली बसोबास गर्ने अनुमान भए पनि एनएसटीमा भने एकहजार ६ सय ६६ मात्र सदस्य छन् । सदस्य संख्या दुई वर्ष अघि भन्दा निकै घटेको छ । सदस्य बन्ने अन्तिमदिनमा संख्या वृद्धि भएको थियो । टेक्सस भनिएपनि यो संख्या बढी ड्यालस केन्द्रित छ ।
प्रतिक्रिया