मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

महामहिम राजदूत अलाइना टेप्लिट्जलाई अमेरिकामा बस्ने नेपालीको पत्र

महामहिम राजदूत अलाइना टेप्लिट्जलाई अमेरिकामा बस्ने नेपालीको पत्र


महामहिम नेपाल स्थित अमेरिकी राजदूत अलाइना टेप्लिट्जज्यू,
 
नेपालमा तपाईँले विविध क्षेत्रमा देखाउनु सकृयताको म प्रशंसा गर्छु । नेपालीसंगै दसैँ मनाउनु भएको, तिहारमा दीपावली गरेर रमाउनु भएको फोटोहरू तपाईँले काठमाडौँ स्थित अमेरिकी दूतावासको फेसबुकमा राख्नु भएको छ । पक्कै पनि यो घुलमिल अत्यन्तै सह्निय छ । यतिमात्र होइन तपाईँ कहिले नेपालको पूर्व त कहिले विकासमा पछि परेको पश्चिम क्षेत्र पुग्नु भएको छ । त्यहाँ स्थानीय नेपालीहरुसंग भेटघाट छलफल गर्नु भएको छ । स्थानीय एफएममा अन्तवार्ताका लागि पुग्नु भएको छ । यो सकृयता पक्कैपनि प्रशंसनिय हो । 
 
अमेरिका र नेपाल यो वर्ष कुटनीतिक सम्बन्ध स्थापनाको ७० औँ बर्षगांठमा पुगेको छ । तपाईँले यस अवसरलाई पनि उपयोग गर्नु भयो । दुई देश बिच आर्थिक सम्बन्ध विस्तारवारे सरोकारसंग छलफलको कार्यक्रम सम्पन्न गर्नु भयो । यस बाहेक थुप्रै अन्य कार्यक्रम पनि भए ।
 
 केही साता अघि नेपालले अमेरिकाबाट ५० अर्ब रुपैंया भन्दा बढीको अनुदान सहयोग पायो । अमेरिकाले एकैपटक यति धेरै रकमको सहयोग नेपाललाई दिएको यो पहिलो पटक हो । यो सहयोग सदुपयोगका लागि राखिएका सर्त पनि नेपालको सन्दर्भमा सान्दर्भिक छन् । तपाईँ लगायत दातृ निकायलाई थाहा छ, नेपालको मुख्य समस्या नै कार्यान्वयनको हो । सहयोग लिन अग्रसर हुने हाम्रो व्युरोक्रेसी यसलाई तोकिएको समय सीमा भित्र उपयोग गर्नमा भने कमजोर छ । 
 
मिलिनियम च्यालेञ्ज कर्पोरेशन (एमसीसी) मार्फत दिइएको उक्त सहयोग पाँच वर्ष भित्र तोकिएको परियोजनामा खर्च भईसक्नु पर्ने सर्त नेपाललाई राख्नु नेपाली जनताकै हितमा थियो । आशा छ, यो सहयोगले नेपालको ऊर्जा क्षेत्र विस्तारमा मुख्य अवरोधका रूपमा देखिएको ट्रान्समिशन लाइनको अभाव हट्ने छ । नेपाली र अमेरिकी सेना बिचको सम्बन्ध त अहिले सबैभन्दा राम्रो अवस्थामा छ, भन्न सकिन्छ । दुई देश बिचका सेनाको भ्रमण बाक्लिएको छ । सेनालाई अमेरिकाले स्काई ट्रक दिनु पनि सैनिक क्षेत्रमा सहयोग बढ्दो क्रममा छ भन्ने तथ्य हो । 
 
नागरिक, सरकार र सेनाको स्तरमा यति राम्रो सम्बन्ध हुदां हुदंै पनि  नेपालको सरकारी स्वामित्वको नेपाल एयरलाइन्स कर्पोरेशनले केही समय यता अमेरिकाको जहाज निमार्ता बोईगंलाई बेवास्ता गरेकोमा हामी नेपाली अमेरिकन खुसी छैनौँ । महामहिम राजदुतज्यू यसमा म तपाईँको ध्यानाकर्षण गराउनु चाहन्छु । मेरो प्रश्न छ किन नेपाल एयरलाइन्सले बोइगं प्रति यस्तो व्यवहार गरिरहेका छ ? 
 
आधुनिक, सुरक्षित र किफायती जहाज बनाउन बोइगं कहलिएको छ । यात्रुहरु अमेरिकाको वोइगं कम्पनीका जहाजमा उड्दा आफ्नो गन्तव्य पुग्नेमा ढुक्क हुन्छन् । म यसमा थप सानो भूमिका बाध्न चाहन्छु । केही दिन अघि नेपाल एयरलाइन्स चढेर म भारतको नयाँ दिल्ली आऊ जाऊ गरेँ । म चढेको नेपाल एयरलाइन्सको उक्त जहाज एयरबस ३२० थियो । केही वर्ष अघि यसरी नै दिल्ली जाँदा बोइगं जहाज चढेको थिएँ । यस पटक एयरवसको जहाज चढ्दा मैले आफूलाई पहिले जस्तो सुविधा महसुस गरिन् । म पहिले दिल्ली जाँदा चढेको नेपाल एयरलाइन्सको बोइगं इन्जिनमा पट्टी बांधेर एउटा कुनामा थन्किएको थियो । फोटो लिन भने भ्याएं । 
 
अमेरिकामा थुप्र्रै एयरलाइन्स कम्पनी छन् । तिनले युरोपमा बन्ने एयरबस पनि किनेका छन् । कुन कम्पनीको जहाज किन्ने यो व्यापारिक निर्णय हो । तर, मलाई लाग्दैन नेपाल एयरलाइन्सले एयरबस मात्र किन्ने विशुद्ध व्यापारिक निर्णय हो । नेपाल एयरलाइन्सका प्रमुख कार्यकारी सुगतरत्न कंशाकार र उनलाई नियुक्त गर्नेहरुको यसमा निहित र व्यक्तिगत स्वार्थ जोडिएको छैन भन्ने म मान्न तयार छैन । यो निहित स्वार्थ किन हटाउन सकिएन भन्ने मेरो प्रश्न हो ।  
 
जहाज थपेपनि सरकारी स्वामित्वको नेपाल एयरलाइन्स सुधार भएको छैन । खर्च बढी छ । एयरपोर्ट व्यवस्थापन यसको अझपनि आम्दानीको मुख्य स्रोत हो । नेपाल एयरलाइन्सलाई नीजिकरण वा रणनीतिक साझेदार नल्याई यो सुधार हुन सक्दैन । यसका लागि आर्थिक सुधार बुझेको प्रधानमन्त्री र अर्थमन्त्री देशलाई चाहिएको छ । यसमा दाताको केही दबाब पनि आवश्यक छ । त्यहाँ थप सकृयताको आवश्यकता छ भन्ने मेरो सुझाव हो । यो नेपाल र सरकारी स्वामित्वको नेपाल एयरलाइन्सकै हितमा छ ।
 
तपाईँलाई जानकारीनै होला वोइंगको मुख्य कार्यालयरहेको वासिंटन राज्यको सियाटलमा बोइगं विक्री गर्नका लागि एउटा सरकारी निकाय नै छ ।  यससँग जोडिएको एउटा प्रसगं राख्न चाहन्छु । केही वर्ष अघि अफ्रिकाको एउटा देशबाट सरकारी प्रतिनिधिमण्डल सियाटल पुगेछन् । उक्त प्रतिनिधिमण्डलले त्यहाँका अमेरिकी लगानीकर्तासंग आफ्नो देशमा पुँजी लगानी गर्न आग्रह गरेछन् । त्यस बेला बोइगं विक्री गर्ने सरकारी निकायका प्रमुखले भनेछन् ठिक छ अमेरिकी लगानीकर्ता तपाईँको देशमा आउंछन म ल्याउंछु तर, त्यस अघि तपाईँले एउटा नयाँ बोइगं जहाज किन्नु पर्छ । त्यही नयाँ जहाजमा अमेरिकी लगानीकर्तालाई लिएर म आउँछु । अन्तत दुवैले यो सर्त पुरा पालना गरेछन् ।
 
अहिलेलाई मेरो तपाईँ प्रति गुनासो यति नै हो । आशा छ, भविष्यमा म नेपाल एयरलाइन्सको बोइगं चढ्न पाउने छु ।
 
वेद पौडेल 
सियाटल, अमेरिका ।