हिमालयखबर संवाददाता–
सान एन्टोनियो – राष्ट्रिय भावना बोकेको ‘बिहान उठ्नेबित्तिकै’ लगायत अन्य लोकप्रिय गीत गाउँदै वरिष्ठ गायक रामकृष्ण ढकालले सान एन्टोनियोवासी नेपालीहरुको मन जित्न सफल भएका छन् ।
सान एन्टोनियो नेपाली संघ (साना) को आयोजनामा गत आइतबार भएको सांस्कृतिक कार्यक्रममा गाएक ढकालले आफ्ना गीतसँगै नेपालीहरुसँग दसैँ–तिहारको रौनक साटेका हुन् ।
प्रस्तुतिका क्रममा गायक ढकालले नेपालको झन्डा फर्फराउँदै यति चोखो, मन पराउने हजार भेटिन्छन्, ओराली लागेको, माया गर्नेको, नजिक आउनुमा, छिटको गुन्यूजस्ता चर्चित गीत गाएर दर्शकलाई उत्साहित बनाएका थिए ।
कार्यक्रमका दौरान दर्शकहरु कतिपय समयमा भूइँमै बसेर गायक ढकालको सुमधुर आवाजमा एकचित्त भएका देखिन्थे । कतिपय समयमा कम्मर मर्काइमर्काइ नाचिरहेका थिए ।
सयौँकोे घुइँचो रहेको दसैँ–तिहार साँझमा नेपालीहरुबीच शुभकामना आदानप्रदान, भेटघाट, ठूलाबडाका हातबाट टीका थाप्नेजस्ता क्रियाकलापले दसैँको माहोल तातेको थियो । त्यसैगरी ठेट नेपाली शैलीमा पाकेको सेलरोटी, खसीको मासुलगायत विभिन्न स्वादिष्ट पकवानले नेपाली चाडबाडको न्यानो अनुभूति दिलाएको थियो ।
कार्यक्रममा गायक ढकालसँगै स्थानीय कलाकारहरुको पनि प्रस्तुति रहेको थियो । झिलिमिली सजिसजाउ स्टेजमा माहोल जमाउन कलाकारहरुले दर्शकसामु विभिन्न नाच तथा गीत पस्केका थिए ।
कार्यक्रममा दसैँको रमझमका साथसाथै सानाले ‘प्रोजेक्ट कोपिला’ नामक समाजसेवा कार्यक्रमको थालनी गरेको आयोजकले घोषणा गरेका थिए । कोपीलाद्वारा सानाले नेपालमा पिछडिएका बालबालिकाको हितमा काम गर्ने योजना बनाएको अध्यक्ष विवेक राजवाहकले जानकारी दिए ।
कार्यक्रममा बोल्दै अध्यक्ष राजवाहकले दसैँ चाड मीठो खाने र लगाउनेमात्र नभई अरुको मद्दत गर्ने पनि भएको र यसैअनुसार कोपिलालाई साथ दिन सम्पूर्ण नेपालीहरुमा आग्रह गरे ।
प्रतिक्रिया