हिमालयखबर संवाददाता–
विराटनगर– मैत्रीपूर्ण फुटसल प्रतियोगिताको उपाधि नेपाल पत्रकार महासंघ मोरङ शाखाले जितेको छ । जुनियर जेसिजको २२ औँ वार्षिक उत्सवको अवसर पारेर जेसिजले विराटनगरमा आयोजना गरेको प्रतियोगितामा आयोजकलाई आठ गोलविरुद्ध नेपाल पत्रकार महासंघले दश गोल गर्दै उपाधिमाथि कब्जा जमाएको हो ।
निकै रोमाञ्चक भएको प्रतियोगितामा सुरुवातदेखि नै नेपाल पत्रकार महासंघका खेलाडीहरु आक्रामक रुपमा प्रस्तुत भएका थिए । खेलको अन्त्यसम्मै आयोजकलाई दबाबमा राख्न सफल भएको पत्रकारको तर्फबाट भुवन लम्सालले ७ गोल, अनिल श्रेष्ठ, हरि अधिकारी र यूकेस लम्सालले १–१ गोल गरी टिमलाई जित दिलाएका हुन् ।
आयोजकको तर्फबाट मुकेश यादव, मिलाप कर्ण, अमन आचार्य, पंकज सापकोटा र नवीन पोखरेलले गोल गरे । प्रतियोगिताको ‘म्यान अफ द म्याच’ सर्वाधिक गोल गर्ने पत्रकारको तर्फबाट भुवन लम्साल घोषित भए ।
जुनियर जेसीजको वार्षिक उत्सवमा साताव्यापी कार्यक्रम गर्ने जुनियर जेसीजको अध्यक्ष सनराइज चौधरीले जानकारी दिए । उत्सवको पहिलो दिन पत्रकारसँग मैत्रीपूर्ण फुटसल प्रतियोगिता आयोजक गरेको अध्यक्ष चौधरीको भनाइ छ ।
प्रतिक्रिया