हिमालयखवर संवाददाता
न्युयोर्क (अमेरिका)- एनआरएन अमेरिकाले शुक्रवार साँझ भेरिफाइड सदस्यता सूची निर्वाचन समितिलाई वुझाएको छ । उक्त सुचीमा एनआरएन अमेरिकामा भेरिफाइड सदस्य सङ्ख्या १४ हजार ८८५ कायम गरिएको छ । यस अनुसार आवेदन दिने मध्ये २ हजार भेरिफाइड हुन सकेनन् ।
यी भेरिफाइड सदस्यले एनआरएन अमेरिकाको आउने निर्वाचनमा मत हाल्न पाउंछन् । एनआरएन अमेरिकाले तोकिएको समय भन्दा एक महिना २० दिन ढिलो गरी भेरिफाइड सदस्य सुची वुझाएको हो । सदस्यता भेरिफाइडमा विभिन्न खालका विवाद आएका थिए ।
एनआरएन अमेरिका निर्वाचन समितिले भेरिफाइड सदस्य सङ्ख्या नदिदां निर्वाचन कार्यक्रम अघि बढाउन नसकिएको उल्लेख गर्दै विज्ञप्ति सार्वजनिक गरेको भोलिपल्ट एनआरएन अमेरिकाले सदस्य सुची दिएको हो ।
आवेदन दिने मध्ये २ हजारलाई किन सदस्यता दिईएन यो बताइएको छैन । एनआरएन अमेरिकाको कार्यसमिति भित्रै भेरिफाइड नहुने सदस्यका बारेमा पारदर्शी रूपमा किन सुचीमा परेन यो भन्नु पर्ने माग उठेको थियो ।
सदस्यता विवाद एनआरएन अमेरिकामा नयाँ होइन । यो कार्यसमितिले नक्कली सदस्य बनाएर निर्वाचन जितेको आरोप लगाइएको थियो । यो विवाद अहिलेपनि अमेरिकी अदालतमा विचाराधिन छ । अहिलेको भेरिफिकेसन पनि निर्वाचनमा नाफा नोक्सानका आधारबाट प्रभावित भएको कार्यसमितिका पदाधिकारीले बताए ।
यस अघि सदस्यता भेरिफिकेसन समितिले सदस्य सङ्ख्यामा विरोधाभास पूर्ण तथ्याङ्क दिएको थियो । । एनआरएन अमेरिकाको सोमवार साँझ बसेको कार्यसमिति बैठकमा समितिका संयोजक तिलक श्रेष्ठले सदस्य सङ्ख्या १४ हजार ७ सय २२ कायम रहेको जानकारी दिएपछि विवाद आएको थियो ।
कार्यसमितिका पदाधिकारीले किन २ हजार भन्दी रद्द भए पारदर्शी गर्न र सूचीमा नपरेका सदस्य आवेदन पनि सार्वजनिक गर्न माग गरेका थिए । श्रेष्ठले भेरिफिकेसनवाट १ हजार ७१८ सदस्य रद्द भई १५ हजार १६५ कायम भएको बताएका थिए । यही आधारमा कार्यसमिति सदस्यले सङ्ख्या किन फरक पर्यो भन्ने प्रश्न केही दिन अघि उठेको थियो । यो भेरिफाइड सुची पनि विवाद मुक्त हुन नसक्ने ती पदाधिकारीले बताए ।
एनआरएन अमेरिकामा कार्यसमितिको पदावधी दुई वर्ष हुन्छ । यो कार्यसमितिले दुई वर्षको अवधि पुरा गरिसकेको छ ।
प्रतिक्रिया