हिमालयखवर संवाददाता
वासिंगटन डिसी (अमेरिका)– नेपालमा आइतबार हुन लागेको स्थानीय निकायको निर्वाचनको जति चासो र चर्चा छ, अमेरिकामा पनि त्यो भन्दा कम्ति छैन ।
नेपालमा भौतिक रुपमा मतदाताहरु विभाजित भएर आफ्नो पक्षका उम्मेदवारहरुलाई जिताउन लागिरहेका छन् भने अमेरिकामा रहेका नेपालका दलका कार्यकर्ता तथा शूभचिन्तकहरुमध्य केही नेपालमै पुगेर मतदात गर्दैछन् र केहीले भने सामाजीक सञ्जालको भरपूर प्रयोग गरेर मत मागिरहेका छन् ।
राप्रपालाई मत दिएर राजतन्त्र फर्काउनेदेखि लिएर ‘सूर्य ध्वजावाहकहरु हाम्रा पनि राम्रा पनि’ सम्मका प्रोफाइल पिक्चर बनाएर अप्रत्यक्ष चुनावी दौडमा अमेरिकाका नेपालीहरु पनि लागेका छन् । जनसम्पर्क समिति अमेरिकाका अध्यक्ष आनन्द विष्टले ‘भोट रुखमा’ भन्दै प्रोफाइल पिक्चर बनाएका छन् । त्यस्तै प्रवासी नेपाली मञ्चका पूर्ब अध्यक्ष सञ्जय थापाकी पत्नी पुनम थापाले पति सहितको एमालेको चुनाव चिन्ह सूर्यको झण्डा बोकेको फोटो फेसबुकमा राखेका छन् ।
सबैभन्दा आश्चर्यजनक तथ्य अमेरिकामा के देखिएको छ भने राप्रपाका एक कार्यकर्ताले ‘भोट गाइमा हालिन्छ, राजतन्त्र चाहिन्छ’ भन्दै फोटो फेसबुकमा राखेका छन् । नेपाल औपचारिक रुपमा गणतन्त्रमा गइसकेको र राप्रपाले समेत राजतन्त्रको एजेण्डालाई बिसर्जन गरिसकेको भएपनि राप्रपा निकट पानस अमेरिकाका महामन्त्री दीपु भुषालले राजतन्त्र चाहियो भन्दै राप्रपाको चुनाव प्रचार गरिरहेका छन् ।
प्रवासी मञ्चका महासचिव राधाकृष्ण देउजाले पनि सूर्य चिन्ह अंकित झण्डा बोकेर आफ्नो फोटो फेसबुकमा राखेका छन् ।
विवेकशील पार्टीका तर्फबाट काठमाडौं महानगरपालिकामा मेयरको उम्मेदवार बनेकी रञ्जु दर्शनाको पक्षमा समेत केही प्रवासी नेपालीहरु देखिएका छन् । टेक्ससका विनय अर्यालले उनको गतिलै प्रचार गरिरहेका छन् । यद्यपी उनी वास्तविक उम्मेदवारीमा निकै कमजोर छिन् ।
अमेरिकामा माओवादी निकटहरु पनि नभएका होइनन् । तर खुलेर कोहीकसैले पनि माओवादीका उम्मेदवारको प्रचारप्रसार गर्ने आँट गरेका छैनन् । माओवादीलाई विगतमा अमेरिकी सरकारले आतंककारीको सूचिमा राखेको थियो ।
अमेरिकामा सबैभन्दा धेरै प्रचार र समर्थन नेपाली कांग्रेसलाई भएको देखिन्छ । अधिकांशले रुख सहितको आफ्नो फोटोलाई प्रोफाइल पिक्चरमा बदलेका छन् । यद्यपी धेरै नेपालीले अमेरिकाकै नागरिकता लिएर मताधिकार समेत प्रयोग गर्दै आएका छन् । तर उनीहरुलाई २० वर्षपछि मातृभूमिमा हुन लागेको चुनावले सबैभन्दा बढी असर गरेको छ ।
फेसबुकमा चुनाव लागेका अधिकांश नेपालीहरुले २०५४ सालमा नेपालमा भएको स्थानीय निर्वाचनमा मताधिकार प्रयोग गरेका थिए । आफ्नो गाउँठाउँको उम्मेदवार हुने, कतिपयका परिवारका सदस्य आफन्त नातागोतानै उम्मेदवार भएका कारण अघिल्ला दुई संबिधान सभाको भन्दा पनि यसपटक उनीहरुलाई चुनाव ज्यादा लागेको छ ।
नेपाली समाज टेक्ससका अध्यक्ष कृष्ण लामिछानेले दुई दिन अघि फेसबुकबाट आफ्ना पिता रामप्रसाद लामिछानेलाई भोट मागे । उनका पिता रामप्रसाद गोरखाको नामजुङ–९ मा वडाध्यक्षको उम्मेदवार छन् । अमेरिकामा रहेका कतिपय नेपालीहरु चुनावकै लागि भनेर नेपाल पुगिसकेका छन् । उनीहरु उम्मेदवारसँगै प्रचारप्रसारमा समेत खटिएका छन् । जनसम्पर्क समिति अमेरिकाका केन्द्रिय सदस्य हरिबोल भण्डारी डेढ महिनादेखि काठमाडौंमा बसेर कांग्रेसको चुनावी सभाहरुमा सकृय छन् ।
उता प्रवासी नेपाली मञ्चकी उपाध्यक्ष यमुना भट्टराई पनि चुनावका लागि भनेर नेपाल पुगेकी छन् । त्यस्तै विवेकशील पार्टीका कार्यकर्ताका रूपमा अमेरिकामा चिनिएका सन्तोष गिरी पनि नेपालमा चुनावी प्रचारका लागि खटिएका छन् ।
प्रतिक्रिया