अप्रावासी अधिकारका लागि क्रियाशील अमेरिकन सिभिल लिर्वटिज् युनियन (एसीएलयू) ले टेक्ससमा यसै साता देखि विवादस्पद इमिग्रेसन बिल (कानुन) कार्यान्वयनमा आएको सन्दर्भमा ट्राभल एड्भाईजरी (भ्रमण सर्तकता) जारी गरेको छ ।
टेक्सस राज्यका गभर्नर ग्रेग अवोटले आप्रावासी (इमिग्रेण्ट) लाई थप कडाई गर्ने कानुनमा यसै साता हस्ताक्षर गरेका थिए । यो कानुनमा प्रहरी र सुरक्षा निकायले बाटोमा हिड्दा हिड्दै पनि शङ्का लागे अमेरिकामा बसोबास गर्न पाउने कागजात छ छैन जाँच गर्न सक्छन् ।
यस्तो कानुनले अमेरिकाको संविधानले दिएको अधिकारलाई उलंधन गर्न सक्ने जनाउंदै एसीएलयूले ट्राभल एड्भाईजारी जारी गरेको हो । गभर्नर अवोटले टेक्सस राज्यलाई सुरक्षित बनाउन यो कानुन ल्याएको दाबी गरेका छन् । तर, एसीएलयूले यस्तो धारणा गलत भएको जनाएको छ ।
अमेरिकी नागरिक लगायत सबै टेक्सस भ्रमण गर्नेलाई सतर्क गराउने यस्तो एड्भाईरजी जारी गरिएको हो । टेक्ससमा कहीँ कतै, चाहे बैध वा अवैध हुनुहोस इमिग्रेसन सम्बन्धी कागजात मागिन सक्छ, एसीएलयूका अधिकारीले विज्ञप्तिमा भनेका छन् ।
राष्ट्रपति डोनाल्ड ट्रम्पको अनुदार आप्रावासी नीतिलाई सहयोग हुने गरी अघिल्लो साता राज्यका विद्यायकले यस्तो कानुनलाई स्वीकृत गरेका थिए । यसलाई गभर्नरले हस्ताक्षर गरेका हुन् । नयाँ कानुनमा आप्रावासी प्रति उदार हुने सुरक्षाकर्मीलाई पक्राउ र जेलमा राख्ने सम्मको व्यवस्था छ । यो कानुनले कतिपय सहरले अपनाउंदै आएको कागजात विहिनलाई पक्राउ परेपनि छाड्ने नीति (सेन्चुरी सिटी)को व्यवस्थामा पनि प्रतिबन्ध लगाएको छ ।
टेक्ससका गभर्नर अवोट रिपब्लिकन पार्टीबाट गभर्नर भएका हुन् । टेक्ससको सिनेटमा रिपव्लिकन पार्टीको बहुमत छ । तपाईँको अमेरिका बस्ने कानुनी कागजात देखाउनुहोस भन्ने यो कानुन प्रति त्यहाँको प्रतिपक्षी डेमोक्र्याट पार्टीका विद्यायकले विरोध गरेका थिए । यसले भेदभाव पूर्ण व्यवहार गर्ने हुदां यस्तो कानुन ल्याउनु हुन्न भन्ने ती विद्यायकले दाबी गरेका थिए । एसीएलयूले यो विवास्दपद कानुनको विरुद्ध अदालत र सडकमा विरोध गर्ने तयारी भइरहेको जनाएको छ ।
टेक्सस नेपाली समुुदाय बाक्लो बस्ती भएको राज्य हो । यो कानुनबाट डलास, ह्यूस्टन, अस्टिन लगायत टेक्ससका विभिन्न स्थानमा बस्ने नेपाली पनि प्रभावित हुन सक्छन् । मेक्सिकोसंग सीमा जोडिएको अमेरिकाकै ठुलो मध्ये टेक्ससमा आप्रावासीको सङ्ख्या पनि ठुलो छ । फोटो साभार: सामाजिक संजाल
प्रतिक्रिया