हिमालयखवर संवाददाता
अमेरिका– अमेरिकाले अफगानिस्तामा कट्टरपन्थी आतंकारीका विरुद्ध अहिलेसम्मकै सबैभन्दा शक्तिशाली गैर परमाणु बम प्रहार गरेको छ । मदर अफ अल बम्स नाम दिइएको उक्त बम आईएसआईएसका विरुद्ध पाकिस्तान अफगानिस्तान सीमा क्षेत्र नंगरहार प्रान्तमा प्रहार गरिएको सञ्चार संस्था सीएनएनले जनाएको छ ।
साँझ साढे सात बजे आईएसआईएसले उपयोग गरेको सुरगंमार्ग ध्वस्त बनाउन उक्त बम प्रहार गरिएको हो । ३० फिट लामो र २१ हजार ६ सय पाउण्ड ९९ हजार ७ सय ९७ किलो० तौल भएको उक्त बम जीपीएस प्रविधिबाट सञ्चालित हुन्छ । अमेरिकी राष्ट्रपति डोनाल्ड ट्रम्पले बम प्रहार पछि यसलाई अर्को सफल कार्य भनेका छन् ।
उक्त बम एमसी १३० जहाजवाट झारिएको अमेरिकी रक्षा विभाग पेन्टागनले जनाएको छ । एयर फोर्स विशेष अपरेशन कमाण्डले उक्त बम प्रहारमा संलग्न थियो । यो आईएसआईएसको सुरुगं र गुफा कम्प्लेक्स ध्वस्त पार्न केन्द्रित रहेको पनि सम्बद्ध अधिकारीले जनाएका छन् ।
अफगानिस्तानका सरकारी अधिकारीहरूले भने यस्तो बम प्रहारको आफुहरुलाई कुनै जानकारी नभएको जनाएका छन् । राष्ट्रपति ट्रम्पले भने यो बम प्रहारको आदेश आफूले दिए नदिएको बारेमा केही प्रतिक्रिया दिएका छैनन् ।
यो बम इराक युद्धका बेला विकसित गरिएको थियो । ठुलो विस्फोट गराउन सक्ने क्षमताको यो बम अफगानिस्तानमा अमेरिकी सेनाले पहिलो पटक प्रयोग गरेको हो । बम प्रहार गर्न अफगानिस्तानमा अमेरिकी सेनाका कमाण्डर जनरल जोन निकोल्सनले लिखित हस्ताक्षर सहित आदेश दिएका थिए । यसले के कति क्षति पुग्यो यसको विवरण आएको छैन । रक्षा स्रोतले यसबारेमा प्रतिवेदन बनाइरहेको जनाइएको छ ।
यो बम प्रहारको समाचार सार्वजनिक भए लगत्तै अमेरिकाको अर्थतन्त्रमा प्रभाव देखिएको छ । मुख्य सेयर बजार बिहीबार १ सय ३८ अङ्कले तल झरेर बन्द भयो । सेयर कारोबारको अन्तिम तिर बजार तीव्र गतिले तल झरेको थियो ।
अमेरिका विदेशमा सक्रिय हुदैंन भन्ने चुनावी नारालाई राष्ट्रपति ट्रम्पले बिस्तारै परिवर्तन गर्दै लगेको सङ्केतको रूपमा यो कारबाहीलाई हेरिएको छ । यसबाहेक सिरियामा मिसाइल प्रहार, नाटो प्रति ट्रम्पको धारणामा परिवर्तनलाई यस्तो सङ्केतका रूपमा हेरिएको हो । तस्बिर: सामाजिक संजाल
प्रतिक्रिया