हिमालयखवर संवाददाता-
ह्युस्टन (अमेरिका) । दुबै आँखामा क्यान्सर भएका कारण नेपालदेखि उपचारको लागि अमेरिका आएको परिवारले सहयोगका लागि अनुरोध गरेको छ ।
राम्जा देउराली-२ पर्वतका प्रकाश गौतम यतिखेर दुई बर्षिया छोरी सुभारम्भी गौतमको उपचारका लागि अमेरिकाको दक्षिणी राज्य टेक्ससको ह्युस्टनमा छन् । घर घडेरी समेत बेचविखन गरेर आएका गौतमले उपचारमा हजारौँ डलर लाग्ने अवस्था आएपछि सहयोगका लागि नेपाली समुदायसँग आग्रह गरेका छन् ।
घरको आर्थिक अवस्था समेत कमजोर रहेको उनले बताए । ३० बर्षिय गौतम पोखराको एक किताब पसलमा काम गर्थे ।
दुई बर्षिया सुभारम्भीको दुबै आँखामा क्यान्सर लागेको छ । एउटा आँखालाई नेपालको तीललंगा आँखा केन्द्रलेनै निकालेको भएपनि अर्को आँखामा समेत क्यान्सर देखिएपछि उपचारमा लामो समय र खर्च लाग्ने अवस्था छ ।
आँखा नदेखेको शंका लागेर पोखराको हिमालय आँखा अस्पतालमा लगेर जाँच गराइएको थियो । हिमालयले काठमाडौँको तीलगंगालाई रिफर गरेको थियो । तीलगंगामा उपचार गराउँदा दुबै आँखामा क्यान्सर भएको पत्ता लागेको थियो । तीलगंगाले समेत पुरै निको पार्न नसक्ने जनाएपछि छोरीलाई लिएर गौतम अमेरिका आएका हुन् ।
परराष्ट मन्त्रालय, नेपाल मेडिकल बोर्डको सिफारिस साथ उनी उपचारका लागि अमेरिका आइपुगेका हुन् ।
छोरीको उपचारका लागि पोखरामा जोडेको घडेरी बेचेर २२ हजार ९ सय डलर नेपालबाटै यहाँको अस्पतालका लागि जम्मा गरेर आएको थिएँ, गौतमले हिमालयखाबर संग बताए । ह्युस्टनको एडरसन क्यान्सर सेन्टरमा सुभारम्भीको उपचार भैरहेको छ । अहिलेसम्म अस्पतालले ८० हजार डलरको बील उनलाई दिइसकेको छ भने थप रकम जम्मा नगरे उपचारमा समस्या हुने जानकारी दिएपछि गौतम चिन्तित भएका छन् ।
हरेक साता रगत जाँच, आँखाको केमोथेरापी गरिरहनु पर्दा उपचार अति महंगो छ । उनीहरुको बसोबासको लागि डोनाल्ड हाउसमा व्यबस्था भएपनि छोरीको उपचारमा लामो समय र खर्च लाग्ने अवस्था आएपछि गौतमले सहयोगको लागि स्थानीय संघसंस्था, नेपाली समुदायसँग आग्रह गरेका छन् ।
नेपाली समाज ह्युस्टन लगायतका संघसंस्थाले उनलाई सहयोग गरिरहेका छन् । मेरो पहिलो र एउटैमात्र छोरी हुन् सुभारम्भी, आँखा निको बनाएर नेपाल फर्कन पाए आनन्द हुन्थ्यो, उनले भने ।
अस्पतालले कति लाख डलरको बील थमाउने हो र कसरी तिर्ने भन्ने चिन्तामा उनी दिनहुँ पिरोलिइरहेका छन् । एउटा आँखा त कहिल्यै पनि काममा नआउने भएकोले नेपालमै डाक्टरहरुले निकालेका छन् । दोस्रो आँखाको उपचारका लागि गौतम अमेरिका आएका हुन् ।
सुभारम्भीको उपचारमा सहयोगका लागि गोफण्डमा खाता खोलेर संकलन सुरु भइरहेको छ । नेपाली समाज ह्युस्टनले समेत गोफण्ड मार्फत सहयोग गर्नका लागि अमेरिकामा रहेका नेपाली समुदायसँग अपिल गरेको छ ।
प्रतिक्रिया