वासिङ्टन डिसी (अमेरिका)- अमेरिकी इमिग्रेशन अर्थरिटीले यस साता करिब आधा दर्जन राज्यमा छापामारी (रेड गरी ) सयौँ कानुनी रूपमा बस्ने कागजात विहिन आप्रावासीलाई पक्राउ गरेको छ । अमेरिकी राष्ट्रपति डोनाल्ड ट्रम्पद्धारा गत जनवरी अन्तिम साता जारी आप्रावासीसंग सम्बन्धित कार्यकारी आदेश पछि यसरी कागजात विहिन आप्रावासीलाई धरपकड गरिएको हो ।
अमेरिका बस्ने आधिकारिक कागजात विना गरैकानुनी रूपमा बस्दै आएका र अपराधमा संलग्नलाई खोजी गर्न यसरी छापा मारिएको भए पनि अपराध नगरेका समेत पक्राउ परेको वासिङ्टन पोष्टले संघिय अधिकारीलाई उदृत गर्दै समाचारमा जनाएको छ । पुर्व राष्ट्रपति बाराक ओबामाका वेलामा पनि यसरी छापा मारिएको भए पनि त्यसवेला यो खाली अपराधमा संलग्नलाई पक्राउ गरी देश निकाला डिर्पोटेशनका लागि गरिएको थियो ।
अहिलेको रेड अमेरिकामा गैरकानुनी रूपमा बस्दै आएका अनुमानित १ करोड १० लाखलाई फिर्ता पठाउने राष्ट्रपति ट्रम्पको नीतिमा केन्द्रित छ । गैरकानुनी रूपमा बस्ने मध्ये करिब ३० लाख अपराधमा संलग्न रहेको अनुमान छ । राष्ट्रपति डोनाल्ड ट्रम्पले चुनावी अभियानकै क्रममा पहिलो चरणमा यस्ता अपराध गरेका गैरकानुनी रूपमा बसोवास गर्दै आएका आप्रावासीलाई देश निकाला गर्ने घोषणा गरेका थिए । राष्ट्रपति भए लगत्तै ट्रम्पले ओबामा प्रशासनमा भएको व्यवस्था परिवर्तन गरी सामान्य अपराध गर्नेलाई पनि देश निकाला गर्ने नीति लिएका थिए ।
इमिग्रेशन अधिकारीले यस साता एटलान्टा, सिकागो, न्युयोर्क, लसएञ्जल्स, नर्थ क्यारिलोना, र साउथ क्यारिलोनाका कार्यस्थल, घर लगायतमा छापा मारी गैरकानुनी आप्रावासीलाई हिरासतमा लिएको जनाएका छन् ।
छिमेकी देश मेक्सिकोले आफ्ना नागरिकलाई विद्यमान परिस्थितिमा अमेरिका भित्र विशेष सतर्क हुन सुझाव दिएको छ । ६ वटा राज्यमा गरिएको यो छापामारीमा नेपाली परे नपरेको अहिलेसम्म सार्वजनिक भएको छैन । पक्राउ पर्नेमा अधिकांश ल्याटिन अमेरिकी देशका नागरिक रहेको संचारमाध्यमले जनाएका छन् ।
आप्रावासी सम्वन्धि मामिला हेर्ने निकाय डिपार्टमेण्ट अफ होमल्याण्ड सेक्युरिटी (डीएचएस) प्रवक्ता जिलियन क्रिस्टेसन्ले अहिलेको रेडलाई नियमित भएको प्रतिक्रिया दिएका छन् । उनका अनुसार सोमबार सुरु भएको रेड शुक्रवार दिउसो समाप्त भएको थियो, यस क्रममा दर्जन ल्याटिन अमेरिकी देशका नागरिक फेला परेका छन् ।
डीएचएसले जानकारी दिए बाहेक अन्य क्षेत्रमा पनि रेड गरिएको इमिग्रेशन अधिकारवादीको दाबी छ । उनीहरूका अनुसार फ्लोरिडा, केन्सस, टेक्सस र नेर्थ भर्जिनियामा पनि रेड गरिएको छ । यस क्षेत्रमा नेपालीहरू पनि बसोबास गर्छन् । अपराधमा संलग्न नभएका समेत रेडका क्रममा पक्राउ परेकामा आप्रावासी समुदायमा चिसो पसेको छ । इमिग्रेसन अधिकारवादीले यो रेडको विरोध गरेका छन् ।
रेडका क्रममा इमिग्रेशन एण्ड कस्टमस् इर्फोस्मेण्ट (आईसीई) का अधिकारीले बिहीबार घर र कार्यस्थलमा केही घण्टा घेरावन्दी गरी कयौँलाई हिरासतमा लिएको इमिग्रेशन अधिकारवादीले जनाएका छन् । आईसीईका फिल्ड डाइरेक्टर डेभिड मारिनले संवाददाताहरुसंगको कुराकानीमा एक वर्ष भन्दा बढी जेल संजाय पाउने अपराधमा संलग्न १ सय ६० लाई पक्राउ गरेको जानकारी दिएका थिए । सम्बन्धित अधिकृतका अनुसार यस मध्ये ३७ जनालाई मेक्सिको डिर्पोट गरिएको छ ।
टेक्सस अस्टिन स्थित सपिंग सेन्टरमा आईसीई एजेण्टले रेड गरिरहेको भिडियो सामाजिक सञ्जालमा राखिएको थियो । टेक्सस लगायत केही राज्यका सर्वसाधारण हिड्डुल गर्ने केही स्थानमा आईडी चेक गरिएको पनि जनाईएको छ । वैधाननिक रूपमा अमेरिका बस्न र काम गर्न पाउने कागजात नभएका र एक वर्ष भन्दा बढी जेल संजाय हुने खालका अपराधमा संलगनलाई अभियानका साथ फिर्ता पठाइने राष्ट्रपति ट्रम्पले बताउँदै आएका छन् । २० लाख भन्दा बढी यस्ता व्यक्ति रहेको अनुमान छ । यो खर्चिलो र व्यवहारिक रूपमा झन्झटिलो पनि छ ।
इमिग्रेशनवारेमा परामर्श दिइरहेका कानुन व्यवसायीले यदि अमेरिका बस्ने वैधानिक कागजात छैन भने केही समय सतर्क हुन सुझाव दिएका छन् । यसरी गैरकानुनी रूपमा बस्नु पहिला र अहिलेपनि उचित नभएको हुदां कुनै वैकल्पिक उपाय सोच्नु पर्ने कानुन विज्ञहरुको सुझाव छ ।
राष्ट्रपति ट्रम्पले पदभार ग्रहण गरेकै साता हस्ताक्षर कार्यकारी आदेशमा ७ वटा मुस्लिम देश सिरिया, इराक, इरान, सोमालिया, सुडान, लिविया र यमन वाट आउनेलाई तिन महिना अस्थायी प्रतिबन्ध लगाउने, मेक्सिको सीमामा पर्खाल निमार्ण, गैरकानुनी रूपमा अमेरिकामा पस्न र बस्न खोज्नेलाई कडाई गर्ने उल्लेख छ । हाललाई अदालतले यो कार्यकारी आदेशलाई रद्द गरेको छ ।
गैरकानुनी रूपमा वस्नेलाई फिर्ता पठाउने कुनै नयाँ होइन । यसअघिका राष्ट्रपति बाराक ओबामाको आठ बर्षे कार्यकालमा पनि वार्षिक सरदर ४ लाख गैरकानुनी आप्रावासीलाई अमेरिकाले फिर्ता पठाएको थियो । यसमा वार्षिक झण्डै २ सयजति नेपालीपनि थिए । यसैले गैरकानुनी आप्रावासीलाई फिर्ता पठाउने निरन्तर प्रकृया हो ।
अमेरिकामा मेक्सिको सिमावाट गैरकानुनी रूपमा आउने विदेशीलाई रोक्न त्यहां पर्खाल लगाउने कार्यकारी आदेशमा उल्लेख छ । यो ट्रम्पको चुनावी एजेण्डामा नै थियो । तर, पर्खाल वन्न केही समय लाग्ने भए पनि सिमा सुरक्षामा जनशक्ति र स्रोत थपिएको छ । फोटो: सामाजिक संजाल
प्रतिक्रिया