हिमालयखवर संवाददाता
सानफ्रान्सिस्को (अमेरिका)- राष्ट्रपति डोनाल्ड ट्रम्पबाट जनवरी अन्तिम साता हस्ताक्षर सात मुस्लिम देशका नागरिकलाई अमेरिका आउन बन्देज लगायतका आप्रावासी सम्वन्धि कार्यकारी आदेश प्रति विरोध जनाउँदै अमेरिकका ठुला ९७ कम्पनी आइतवार अदालत गएका छन् ।
सुचना प्रविधि क्षेत्रका संसारकै ठुला फेसवुक, एप्पल, गुगल, माइक्रोसफ्ट, नेटफ्लिक्स, टिवटर, इन्टेल जस्ता सिलिकन भ्यालीका प्रभावशाली कम्पनीले राष्ट्रपति ट्रम्पको आप्रावासी नीति विरुध्द सानफ्रान्सिस्को अदालतमा याचिका दायर गरेका हुन् । याचिकामा ती कम्पनीले राष्ट्रपतिको कार्यकारी आदेशले कानुन र संविधानको उल्लंघन गरेको दावी गरिएको छ ।
अचानक गरिएको यस्तो निर्णयले अमेरिकाको व्यवसायिक वातावरणमा प्रतिकुल असर पार्ने ती कम्पनीको दावी छ । सीएनएनका अनुसार नाइथं सर्किट र्कोट अफ अपील्समा याचिका दायर गरिएको हो । अदालतले आफ्नो निर्णय दिनु अघि दुवै पक्षलाई आफ्नो पक्षका कानुनी आधारहरु राख्न भनेको छ ।
हाल ती कम्पनीले याचिका दायर गरेको अदालत अमेरिकामा नै सबैभन्दा उदार मानिन्छ । त्यहाँबाट जे निर्णय भएपनि यो मुद्दा अन्तत सर्वोच्च अदालत पुग्ने संभावना रहेको सीएनएनले उल्लेख गरेको छ । सुचना प्रविधिसँग सम्वध्द ती कम्पनीले आप्रावासीले अमेरिकाको अर्थतन्त्रमा महत्वपुर्ण भुमिका खेलेको दावी गरेको छन् । आप्रावासीले धेरै देशलाई आफ्नो सृजना र आविष्कारले महान बनाएको उनीहरुले भनेका छन् ।
अमेरिकाका कम्पनी राष्ट्रपति ट्रम्पको कार्यकारी आदेश विरुध्द अदालत गएको यो पहिलो भने होइन । गत साता नै अमेजन र एक्स्पिडियाले कानुनी लडाई शुरु गरेका थिए । राष्ट्रपतिको कार्यकारी आदेशले आफ्ना कर्मचारी र व्यवसायमा व्यवधान आएको यी कम्पनीको दावी थियो ।
उवरका प्रमुख कार्यकारीले पनि यात्रा वन्देश नीतिको विरोध जनाउँदै राष्ट्रपतिको सल्लाहकार समुहवाट आफुलाई अलग गरेका थिए । उवर र प्रतिद्धन्दी लिफ्ट यात्रा वन्देजको विरोधमा एकै ठाउंमा आएका छन् ।तस्बिर: सामाजिक संजाल
प्रतिक्रिया