‘…बाध्य भइयो परदेशमा छिर्न
आमा मैले पढ्दा लागेको ऋण तिर्न
आमा बिदा पाउँदिन
अहिलेको दसैँमा आमा घरमा आउँदिन…’
जव बद्री पंगेनी मञ्चमा उत्रिए, तव माहोल एकाएक शान्त भयो । किनकि लोकगायक पंगेनीले आफूले गीत गाउनुअघि वैदेशिक रोजगारको यथार्थ पीडा र अवस्थाबारे वर्णन गरेका थिए । परदेशीको पीडालाई लयमा गाउन थालेपछि निकै रौनक बनेको चितवन महोत्सवको माहोल एकाएक शान्त बनेको थियो ।
आफूले गाएको गीतको उक्त अंश सुनाउनुअघि गायक बद्री पंगेनीले दुई आमा गुमाउनुको पीडा पोखेका थिए । आमाप्रति आफ्नो सधैँ उच्च सम्मान रहने भन्दै पंगेनीले सुरूवातमै उक्त गीत गाएका थिए ।
चर्चित लोकगायक बद्री पंगेनीले उक्त गीतको टुक्का गाउँदै गर्दा चितवन महोत्सव कार्यक्रमस्थल निकै भावुक बनेको थियो । कार्यक्रममा उपस्थित भएकाहरु शान्त वातावरणमा गीत सुनिरहेका थिए ।
जव बद्री पंगेनी हाते माइक लिएर दुःखको गीत गाउँदै दर्शकमाझ आए, माहोल एकाएक फेरियो । धेरैको आँखा रसाएका थिए । सबै भावुक देखिन्थे । बद्रीको गीत सुनेर कपाल पाकेकी ६० वर्षीया वृद्धा धुरुधुरु रोइरहेकी थिइन् । रुनेमध्येकी ती वृद्धा प्रतिनिधि पात्रमात्र थिइन् । किनकि बद्रीको उक्त गीत सुन्दा प्रायः महिलाका आँखा रसाएका थिए ।
‘यस गीतले हरेक घरको आवाज बोलेको छ’, भावुक अवस्थामा मंगलपुरकी रीता पुनले भनिन्, ‘साँच्चै गीतले समाजको पछिल्लो अवस्था चित्रण गरेको छ ।’
आउँछु एकदिन बस् भर परेर
आमा पाखोबारी फर्काउने गरेर
पीडाको गीत पस्कने क्रममा गायक पंगेनीले ‘मन थिएन जोगी बन्नलाई’ भन्ने गीत गाएका थिए । त्यस्तै पञ्चेवाजाको तालमा पनि उनले गीत गाए । सुरूमा परदेशको पीडा सुनाएका पंगेनीले अन्तिम प्रस्तुतिस्वरुप निकै नै चर्चित गीत ‘ससुरालीमा ख्यालख्यालमै दिल बस्यो कान्छी सालीमा’ गाए । पंगेनीले उक्त गीत गाउँदा दर्शकले नाचेर पूर्ण मनोरञ्जन लिएका थिए ।
प्रतिक्रिया