चितवन, १६ पुस । पर्यटकीय नगरी सौराहामा आयोजना गरिएको हात्ती महोत्सवअन्तर्गत सञ्चालित हात्ती फाष्ट वाकको उपाधि एकताकली ‘बी’ ले जितेको छ ।
प्रतिस्पर्धी १९ हात्तीलाई पछाडि पार्दै एकताकलीले उपाधि जितेको हो । सौराहाका व्यवसायी हस्तबहादुर भट्टराईको हात्तीले हरेक चरणमा अग्रता लिँदै च्याम्पियन बनेको हो ।
प्रतियोगितामा युवराज पौडेलको एलिसाकली दोस्रो र दामोदर रेग्मीको मारूतीकली तेस्रो भएको थियो । हात्तीको अधिकारका कुरा उठ्न थालेपछि यस वर्ष हात्ती दौडलाई परिमार्जन गरी हात्ती फाष्ट वाक गरिएको हो ।
हात्तीलाई ३०० मिटरको दूरी एकतर्फीमात्र दौडाइएको थियो । त्यसैगरी हात्तीका छावाबीचको रोमाञ्चकारी फुटबल प्रतियोगिताको उपाधि सीजी फुड्सले जितेको छ ।
नबिल बैंकलाई २ शून्यको गोल अन्तरले पछि पार्दै सीजी फुड्सले उपाधि जितेको हो । हात्तीका छावाहरुको फुटबलका लागि एक समूह चितवन राष्ट्रिय निकुञ्ज र अर्को समूह सौराहाका व्यवसायी ओम रिजालको हात्तीका छावाहरुले खेलेका थिए । सीजी फूड्सको जितका लागि सौराहा गजले एक गोल गरेको थियो ।
नबिल बैंकको प्रतिनिधित्व गरेको चुरिया जगले आत्मघाती गोल गरेर सीजी फुड्सलाई अग्रता दिलाएको थियो । प्रतियोगिता भरि राम्रो खेल प्रदर्शन गरेको सौराहा गजले ४ गोल गरेर चर्चामा आएको थियो । यसअधि मंगलबार भएको सुन्दरी प्रतियोगिताको उपाधि समृद्धिकलीले जितेको थियो ।
महोत्सव समापन कार्यक्रमका प्रमुख अतिथि पर्यटन मन्त्रालयका सचिव दिनेशकुमार थपलियाले सबै प्रतियोगितामा पहिलो, दोस्रो र तेस्रो भएका टिमलाई पुरस्कार र प्रमाणपत्र वितरण गरेका थिए । महोत्सवअन्र्तगत हात्ती वनभोज कार्यक्रम, टागा दौड, डुंगा दौड गरिएको नतिजा प्रकाशन समितिका संयोजक ऋषि तिवारीले जानकारी दिए ।
चितवनमा पर्यटन प्रबद्र्धन गर्ने उद्देश्यले क्षेत्रीय होटल संघ सौराहाले महोत्सवको आयोजना गरेको हो । महोत्सव समापन कार्यक्रममा पर्यटन सचिव थपलियाले भूकम्प र नाकाबन्दीले थलिएको पर्यटनलाई उकास्न नयाँ योजना सुरू भइसकेको बताए ।
नेपालमा पर्यटक तान्न गर्नुपर्ने सबै काम गर्ने गरी सरकारले रणनीतिक योजना सुरू गरेको उनको भनाइ थियो । चिनिया पर्यटकलाई भिसा शुल्क नलिने निर्णय नयाँ योजनाको सुरूवात भएको उनले बताए । सचिव थपलियाले पर्यटन विकासको लागि व्यवसायी र सरकारीको सहकार्यमा पर्यटनमैत्री कार्यक्रम सञ्चालन गर्न आवश्यक रहेको बताए ।
कार्यक्रममा स्थानीय विकास अधिकारी श्रवणकुमार पोखरेल, चितवन राष्ट्रिय निकुञ्जका वार्डेन रामचन्द्र कँडेल, राष्ट्रिय प्रकृति संरक्षण कोष सौराहाका प्रमुख डा। चिरञ्जीवी पोखरेल, चितवन पर्यटन विकास समितिका अध्यक्ष दिलिप मैनालीलगायतले बोलेका थिए ।
कार्यक्रम क्षेत्रीय होटल संघ सौराहाका अध्यक्ष ज्ञानेन्द्रकुमार विष्टको अध्यक्षतामा भएको थियो । पौष ११ गतेबाट सुरू भएको महोत्सव बुधबार सकिएको हो ।
प्रतिक्रिया