काठमाडौं, श्रावण २९ । नेपाल समूह विजेता बन्दै साफ यु–१६ फुटबल च्याम्पियनसिपको सेमिफाइनलमा पुगेको छ ।
समूहमा अपराजित रहँदै सेमिफाइनलमा पुग्नेक्रममा शुक्रबार दोस्रो खेलमा नेपालले अफगानिस्तानलाई १–० ले पराजित गर्यो । बंगलादेशको सिलेटमा भएको खेलमा नेपालले गोल गर्ने थुप्रै अवसर खेरफाले पनि ४७औं मिनेटमा क्षितिज राजले निर्णायक गोल दिलाए ।
यसअघि, नेपालले समूहको पहिलो खेलमा माल्दिभ्सलाई ५–० ले हराएको थियो ।
शुक्रबारको खेलसँगै सेमिफाइनल समीकरण पनि पूरा भएको छ । नेपालले सेमिफाइनलमा आइतबार भारतसँग खेल्ने भएको छ ।
यसैगरी, दोस्रो सेमिफाइनलमा अर्को समूहको विजेता बंगलादेश र अफगानिस्तान भिड्ने छन् । ६ टिमले सहभागिता जनाएको प्रतियोगितामा माल्दिभ्स र श्रीलंका समूह चरणबाटै बाहिरिएका छन् ।
प्रतिक्रिया