चितवन–ट्वेन्टी–ट्वेन्टी विश्वकप छनौट प्रतियोगितामा नेपालले शुक्रबार पपुवा न्युगिनीसँग खेल्दैछ । नेपालले समुह चरणको आफ्नो पाँचौं खेलमा पपुवान्युगिनीको सामना गर्न लागेको हो । नेपाल र पपुवा न्युगिनीबीचको खेल नेपाली समयअनुसार दिउँसो पौने ३ बजेपछि आयरल्याण्डको डबलिनमा सुरु हुनेछ ।

यसअघि खेलका चार खेलमा दुईमा हार, एकमा जित र एक खेलमा अंक बाँडेको नेपाल पपुवा न्युगिनी विरुद्धको खेलमा जित निकाल्दै ट्वेन्टी–ट्वेन्टी विश्वकप प्रतियोगिताका लागि छनौट हुने सम्भावना जीवितै राख्ने दाउका साथ मैदान उत्रने छ । नेपाललाई विश्वकपका लागि छनौट हुने सम्भावना कायम राख्नका लागि खेल जित्नैपर्ने दबाब छ ।

चार खेलबाट मात्रै ३ अंक जोडेको नेपाल समुह एको पाँचौं स्थानमा छ । तीन खेलबाट पाँच अंक जोडेको पपुवा न्युगिनी भने दोस्रो स्थानमा छ । जर्सी र आयरल्याण्डलाई पराजित गरेको पपुवा न्युगिनीले हङकङसँग अंक बाँडेको थियो ।पहिलो खेलमा अमेरिकालाई ६ विकेटले हराउनु

बाहेक नेपालले राम्रो प्रदर्शन गर्न सकेको छैन । वर्षाका कारण प्रभावित भएको नामिबियासँगको खेलमा अंक बाँडेको नेपाल त्यसपछिका दुई खेलमा पराजित भयो ।

तेस्रो खेलमा आयोजक आयरल्याण्डसँग ८ विकेट तथा चौंथो खेलमा हङकङसँग ५ विकेटले पराजित भएको नेपालले अब पपुवा न्युगिनीसहित जर्सीसँग मात्रै खेल्न बाँकी छ । यी दुवै खेलमा जित निकाल्दै सन् २०१६ मा भारतमा हुने विश्वकपका लागि छनौट हुने सम्भावना जिवित राख्नु नेपाली टिमको चुनौती हो ।

 

चार खेलबाटमात्रै ३ अंक जोडेको नेपाल समुह एको पाँचौं स्थानमा छ । तीन खेलबाट पाँच अंक जोडेको पपुवा न्युगिनी भने दोस्रो स्थानमा छ । जर्सी र आयरल्याण्डलाई पराजित गरेको पपुवा न्युगिनीले हङकङसँग अंक बाँडेको थियो ।

नेपाल र पपुवा न्युगिनीबीचको खेल टेलिभिजनमा प्रत्यक्ष प्रशारण हुनेछ । आयरल्याण्ड गएर प्रत्यक्ष हेर्न नपाएका धेरैले घरमै बसेर खेल हेर्न पाउने छन् । नेपाल र पपुवा न्युगिनीबीचको खेल स्पोर्टस च्यानल स्टार स्पोर्टस फोरले प्रत्यक्ष प्रशारण गर्ने छ । आइसिसीले विश्वकप छनौटका ५१ मध्ये २० वटा खेलको प्रत्यक्ष प्रशारणको व्यवस्था गरेको छ । जर्सी विरुद्धको नेपालको शनिबारको खेल पनि प्रत्यक्ष प्रशारण हुनेछ ।