ललितपुर । गत वैशाख १२, १३ र २९ गते गएको विनासकारी भूकम्पका कारण ८२ जना बालबालिकाले बाबुआमा गुमाउनु परेको छ । 

 

भूकम्प प्रभावित जिल्ला धादिङ, नुवाकोट, गोरखा, सिन्धुपाल्चोक, दोलखा, काठमाडौँ, ललितपुर र भक्तपुरलगायत १४ जिल्लामा ८२ जनाले बाबुआमा दुवै गुमाएका छन, भने २८६ जनाले आमा मात्र गुमाएका र ४२७ जनाले बाबु गुमाएका छन् । 

 

केन्द्रीय बालकल्याण समितिले यहाँ आज आयोजना गरेको पत्रकार सम्मेलनमा समितिका अध्यक्ष डिल्लीराम गिरीले भूकम्प बालगृहको अवस्थाबारे अनुगमन भइरहेको बताउदै कानूनी प्रक्रिया पूरा गरेर मात्र नयाँ बालगृह खोल्न सबैसँग आग्रह गर्नुभयो । 

 

समितिका कार्यकारी निर्देशक तारक धितालले प्रभावित १४ जिल्लाको अनुगमनबारे जानकारी दिँदै टुहुरा बालबालिकालाई समितिको निर्देशनमा एसओएस बालग्राममा सुरक्षित राखिएको बताउनुभयो । 

 

समितिले भूकम्पपछि खुल्ला स्थानमा बस्ने सुत्केरी र गर्भवती महिलालाई विशेष प्राथमिकता दिनसमेत आग्रह गरेको छ । 

 

त्यसैगरी जेठ २० गतेसम्म दुई हजार २३ जना बालबालिकाको भूकम्पका कारण मृत्यु भएको छ ।

 

निर्देशक धितालले भूकम्पपछि धेरै बालबालिका अझै पनि सामूहिक रूपमा खुल्ला ठाउँमा त्रिपालमुनी बस्नुपर्ने बाध्यता भएको हुँदा बालबालिकामाथि हुनसक्ने यौनजन्य ंिहंसा र बेचबिखन रोक्नका लागि अभिभावकले आफ्ना बालबालिकालाई आफूसँगै साथमा राख्नु पर्नेमा जोड दिनु भयो । रासस