युलेस, टेक्सस — सुदूरपश्चिम नेपालको मौलिक संस्कृति र धार्मिक परम्परालाई अन्तर्राष्ट्रिय मञ्चमा उजागर गर्ने उद्देश्यले आगामी अगस्ट ३१ तारिक (आइतबार) का दिन गौरा पर्व मनाउने तयारी भएको छ ।

युलेस स्थित श्री पशुपतिनाथ तथा बुद्ध विहारमा कार्यक्रम आयोजना गरिने भएको छ। कार्यक्रममा नेपाल आइडल सिजन-२ का विजेता रबी ओड तथा देउडा गीतकी चर्चित गायीका रेखा जोशीको विशेष प्रस्तुति रहनेछ।

गौरा पर्व विशेष गरी सुदूरपश्चिम नेपालमा मनाइने एक प्रमुख धार्मिक चाड हो, जसमा देवी गौरा (पार्वती) र भगवान शिवको विवाहको सम्झनामा श्रद्धा, भक्ति र पारिवारिक सुख-शान्तिको कामना गरिन्छ। महिलाहरू व्रत बस्ने, पवित्र धागो लगाउने, बिरुडा पंचमीको पूजा गर्ने परम्परा यस पर्वमा विशेष छ।

देउडा गीत, नृत्य र सुदूरपश्चिमको सांस्कृतिक झल्कोले भरिएको यो कार्यक्रमले टेक्सासमा नेपाली समुदायलाई एकत्रित गर्ने अपेक्षा गरिएको फार वेस्टर्न सोसाइटी टेक्ससकी महासचिव गुञ्जन भण्डारीले जानकारी दिइन् ।

उक्त दिन बिहान ८ बजेबाट साँझ ६ बजेसम्म कार्यक्रम हुनेछ । मुख्य प्रस्तुति गौरा खेलाउने परम्परागत विधि भने बिहान ११ बजे राखिएको छ ।

टेक्ससको राजधानी शहर अस्टिनमा भने ३० तारिक कार्यक्रम राखिएको छ।