ड्यालस (अमेरिका) । नेपाली समाज टेक्ससको आयोजनामा शनिबार र आइतबार भएको अन्तरराज्य भलिबल प्रतियोगितामा न्यूयोर्कलाई हराउँदै क्यालिफोर्निया विजयी भएको छ ।

अमेरिकाका बिभिन्न राज्यका १६ वटा नेपाली टिमको सहभागिता रहेको भलिबलमा आइबार फाइनल आयोजना गरिएको थियो । आइतबार अपरान्ह ग्राण्डपेरीको इन्डोर भलिबल कम्प्लेक्समा आयोजित प्रतियोगितामा सोझो तीन सेटमा तीनै सेट जितेर सानफ्रान्सिस्को भलिबल टीम एनएसटी कपको विजेता भएको हो ।

लगातार पहिलो तीन खेलमा क्यालिफोर्नियाको सानफ्रान्सिस्को भलिबल टिमले जितेपछि बाँकी दुई खेलहरू भएनन् । न्यूयोर्कका खेलाडीहरुले पनि निकै रोचक र प्रतिस्पर्धात्मक रुपमा खेल खेलेका थिए । तर नतिजा अाफ्नो पक्षमा पार्न सकेनन्  ।

उपविजेता न्यूयोर्कको रिजवड नेपाली सोसाइटीको टिम भयो । त्यस्तै सेमी फाइनलमा रुकुम पश्चिम टिम बिजयी भएर तेस्रो भएको छ ।

प्रतियोगितामा पहिलो हुने टिमलाई ८ हजार डलर, दोस्रो हुनेलाई पाँचहजार र तेस्रो हुनेलाई दुई हजार डलर सहित शिल्ड र मेडल प्रदान गरिएको थियो । कार्यक्रममा नेपाली समाज टेक्ससले उत्कृष्ठ खेलाडी, अनुशासित खेलाडी, म्यान अफ दी म्याच लगायत बिभिन्न विधामा पदक र प्रमाणपत्र प्रदान गरेको थियो ।

दुई दिनसम्मको खेलमा दिपक केसी म्यान अफ दी म्याच घोषणा भएका थिए ।

अमेरिकाका बिभिन्न राज्यमा रहेका नेपाली खेलाडीहरु बीच सम्बन्ध विस्तार, सद्भाव कायम राख्न खेल आयोजना गरिएको नेपाली समाज टेक्ससका अध्यक्ष राजेन्द्र वाग्लेले बताए ।

खेल आयोजना गर्न सहयोग गर्ने स्पोन्सर, स्वयम्सेवकहरुलाई समेत त्यस अवसरमा सम्मान गरिएको थियो ।