ड्यालस (टेक्सस) । प्रेस काउन्सिल नेपालका अध्यक्ष बालकृष्ण बस्नेतले सत्य तथ्य समाचारका लागि पत्रकारिता क्षेत्र मात्र चिन्तित भएर समस्या समाधान नहुने बताएका छन् ।

हाल अमेरिका भ्रमणमा रहेका अध्यक्ष बस्नेतले आइबार टेक्ससको ड्यालसमा स्थानीय नेपालीमुलका सञ्चारकर्मी तथा समुदायसँगको अन्तरकृयाका क्रममा उक्त कुरा भनेका हुन् । बस्नेतले सही र सत्य समाचारका लागि पाठकवर्ग पनि सचेत हुनुपर्ने बताए । सत्य समाचार नदिनेलाई पाठकहरुले विश्वास गर्न छाड्नुपर्ने पनि उनले उल्लेख गरे ।

‘अहिले पत्रकारिता छ्यासमिस (मिक्सम्याच) भएको छ । पत्रकार को हुन् ? मिडिया कस्लाई भन्ने, न्यूज मिडिया र सोसल मिडियाको अन्तर कस्ले पर्गेल्ने ?’ अध्यक्ष बस्नेतले प्रश्न गरे । सोसल मिडियामा लेखिएका कुरालाई समाजले न्यूज मिडियाका रुपमा लिन नहुने र त्यसो भन्दैमा सोसल मिडियामा जे मन लाग्यो त्यही लेखेर समाजलाई भ्रमित पार्न अब नपाइने समेत उनले बताए ।

उनले घरघरमा विखण्डन गराउने र किचनदेखि बेडरुम सम्मका कुराहरुलाई बाहिर ल्याउनेमाथि आचार संहिताको कारवाही गर्न थालिएपछि त्यसमा कमि आएको समेत उनले उल्लेख गरे । प्रेस काउन्सिलले जथाभाबी कन्टेन्ट तयार पारेर युटूबमा हाल्ने माथि कारवाही तीब्र बनाएको छ ।

कार्यक्रममा मिडिया अध्येता विनय गुरागाईले आचार संहिताको विश्वव्यापी प्रचलन र नेपालको विद्यमान अवस्थाका बारेमा प्रस्तुतिकरण दिएका थिए ।

नेजाको आयोजनामा भएको कार्यक्रममा सहभागीहरुले नेपालमा फैलिँदो गलत समाचारलाई निमिट्यान्न पार्न काउन्सिल दह्रो हुनुपर्ने र गलत अफवाह फैलाउने मिडिया र सञ्चारकर्मी माथि कारवाही गर्नुपर्ने, अनुगमन प्रभावकारी हुनुपर्ने सुझाव दिएका थिए ।

नेजा अध्यक्ष सुरज भण्डारीको सभापतित्वमा भएको कार्यक्रममा अध्यक्ष बस्नेतलाई सम्मान पनि गरिएको थियो । सो अवसरमा नेपाल पत्रकार महासंघका पूर्ब केन्द्रीय सदस्य तथा नेजाका सल्लाहकार सञ्जय घिमिरेले नेपालदेखि अमेरिकासम्मको पत्रकारिताको अवस्थाका बारेमा चर्चा गरेका थिए ।