ड्यालस (अमेरिका) । टेक्ससको ड्यालस फोर्टवर्थ मेट्रोप्लेक्समा रहेको नेपाली सांस्कृतिक तथा आध्यात्मिक केन्द्र (पशुपतिनाथ मन्दिर तथा बौद्ध बिहार) को नयाँ कार्यसमितिका सबै जना निर्विरोध चयन भएका छन् ।

शनिबार अपरान्ह ५ बजेसम्म मनोनयनको समय रहेकोमा सबै पदमा एक एक जनको मात्र उम्मेदवारी परेको निर्वाचन समितिका संयोजक बैकुण्ठ बिक्रम थापाले जानकारी दिए । सन् २०२५/२६ का लागि नेपाली सांस्कृतिक तथा आध्यात्मिक केन्द्र बोर्ड अफ ट्रष्टीको अध्यक्षमा डा. प्रेम अधिकारीको मात्र उम्मेदवारी परेको छ । अधिकारी ट्रष्टीका वर्तमान उपाध्यक्ष हुन् ।

त्यस्तै केन्द्रको कार्यकारिणी समितिको अध्यक्षमा पुनः सीता बस्नेत सापकोटा निर्विरोध भएकी छिन् ।

निर्वाचन समितिले शनिबार साँझ सार्वजनिक गरेको उम्मेदवार सूचि अनुसार बोर्ड अफ ट्रष्टीको उपाध्यक्षद्वयमा भुवन आचार्य र रबिन खनाल, आर्थिक डाइरेक्टरमा विजय हुमागाई, सम्पत्ति व्यबस्थापन डाइरेक्टरमा कवि मैनाली र सचिवमा दीपकराज सिलवाल निर्विरोध भएका छन् ।

त्यस्तै मन्दिर कार्यसमिति तर्फ उपाध्यक्षद्वयमा छबी चापागाई र शैलेन्द्र मानन्धर निर्विरोध भएका छन् । त्यस्तै निर्विरोध भएका पदाधिकारीहरुमा महासचिवमा लक्ष्मी पौडेल अधिकारी, सचिवमा सुमन कार्की, कोषाध्यक्षमा दिनेश न्यौपाने, सहकोषाध्यक्षमा बासु श्रेष्ठ चयन भएका छन् । त्यस्तै महाप्रसाद संयोजकमा अच्युत थापा, सर्च कमिटीमा मकर बज्राचार्य, महाप्रसाद खरिद समिति संयोजकमा सबिता बर्तौैला न्यौपाने, सूचना प्रविधि संयोजकमा जीवन घिमिरे, स्वयमसेवक संयोजकमा विवेक कँडेल र महिला संयोजकमा मुना खरेल निर्विरोध भएका छन् ।

युथ काउन्सिल मेम्बरमा भने कसैको पनि उम्मेदवारी नपरेको समेत निर्वाचन समितिले जनाएको छ । १८ वर्षदेखि ३० वर्ष उमेरका युवाले मात्र यो पदमा आवेदन दिन पाउने प्रावधान अनुसार उम्मेदवारी परेको छैन ।

नयाँ कार्यसमितिले आउँदो नयाँवर्ष २०२५ सँगै आफ्नो कार्यभार सम्हाल्नेछ । परेको उम्मेदवारी माथि १७ तारिकसम्म दावी विरोध गर्न सकिनेछ । शपथ ग्रहण २८ तारिक शनिबार हुनेछ ।

नयाँ कार्यसमितिले निर्माणाधिन मन्दिरको दोस्रो चरण सुरु गरेर सम्पन्न गराउनेमा सदस्यहरुले अपेक्षा लिएका छन् । त्यस्तै नेपाली समाज टेक्सससँगको सहकार्यमा नेपाली पाठशालालाई थप व्यबस्थित बनाउने र मन्दिरमा ड्यालस फोर्टवर्थ मेट्रोप्लेक्समा रहेका हरिक परिवारको सहभागिता र साथ जुटाउने अपेक्षा समेत सदस्यहरुले लिएका छन् ।