हिमालय खबर मिडिया १३ वर्ष पूरा गरी १४ औँ वर्ष प्रवेश गरेको छ । यी वर्षहरु हाम्रा लागि उतारचढावपूर्ण रहे । विश्वभर पत्रकारिता व्यवसायले चुनौतीहरु सामना गर्नुपरेको अवस्था हामीले पनि भोगिरहेका छौँ । सञ्चार माध्यम व्यावसायिक हुनका लागि चाहिने स्रोत साधन हामीसँग पनि अभाव रह्यो । यति हुँदाहुँदै पनि पत्रकारिताको मूल्य र मर्मसँग हामीले कहिले पनि सम्झौता गरेनौँ । कहिले निकै सक्रिय भएर हामीले नेपाली समुदायका मुद्दालाई उठायौँ, कहिले सीमित स्रोतले हामीलाई निष्क्रिय पनि बनायो । हाम्रो प्रयास नेपाली समुदायको हितमा सूचना र समाचार दिन सधैँ सक्रिय भइरहने हो । आउने दिनमा अझ सक्रिय हुनका लागि हामी प्रयासरत रहने छौँ । हामी अहिले विदेशमा बसेर नेपाली समुदायका लागि सरल र सुलभ सूचना तथा जानकारी दिइरहेका छौँ ।

हाम्रो योजना अंग्रेजी संस्करण पनि ल्याउने हो । यसका लागि हामी प्रयासरत छौँ । अहिले नेपाल बाहिर पनि ठूलो नेपाल छ । तर, विदेशमा बस्ने नेपालीले अहिले हेपिएको महसुस गरिरहेका छन् । विदेशमा बस्ने नेपालीले स्वदेशी सुविधा प्रयोग नगरी कमाएको पैसा पठाएर देशको अर्थतन्त्रलाई योगदान दिइरहका छन् । विदेशमा रहेका नेपालीले कमाएर स्वदेश र विदेशमा रमाएका छन्, देशमा बसेर भष्ट्राचार त गरेका छैनन्, कसैलाई ठगेका छैनन् । अहिले देशले किन्ने विदेशी समानका लागि चाहिने विदेशी मुद्राको स्रोत नै रेमिट्यान्स हो । रेमिट्यान्स मात्रले देशको आर्थिक विकास हुँदैन । तर, अहिले नेपालका लागि रेमिट्यान्सको विकल्प पनि छैन । नेपालको अर्थतन्त्र अहिले मन्दीको अवस्थामा छ । जति ठूला भाषणहरु गरे पनि विदेशमा बस्ने नेपालीले कमाएको स्रोत र साधन नेपाल नलग्दासम्म मन्दीबाट देशमुक्त हुन कठिन छ । देशले उदार भएर विदेशमा बस्ने नेपाली देशमा आउने वातावरण तयार नपारिकन मन्दी सकिने अवस्था छैन ।

नेपाली नागरिकताको निरन्तरता, सहासिलो आर्थिक सुधार, सुशासन हुने हो भने थुप्रै नेपाली थप स्रोत लिएर नेपाल जानसक्छन् । अब यसतर्फ उदार भएर सोच्नुपर्ने आवश्यकता छ । हिमालय खबर यी यस्ता विदेशमा बस्ने नेपालीका मुद्दा उठाउन कहिल्यै पछि पर्ने छैन । हामीले कयौँ सन्दर्भमा नेपाली समुदायको हितका मुद्दा उठाएका छौँ । हामीले उठाउनुपर्ने मुद्दामा हामी स्पष्ट पनि छौँ । हामीलाई बढीभन्दा बढी नेपाली समुदायको प्रोत्साहन आवश्यक छ । निडर भएर हाम्रो समुदायका मुद्दा उठाउन हामी पछि पर्ने छैनौँ । हामी समुदायका मुद्दामा इमान्दार छौँ र इमान्दार रहिरहने छौँ । यहाँहरुको हिमालय खबरप्रतिको माया र सद्भावका लागि हामी आभारी छौँ । हामी १३औँ वर्ष पूरा गरी १४औँ वर्षमा प्रवेश गर्दागर्दै स्वदेश र विदेशका आमपाठक, लेखक, पत्रकार, विज्ञापनदाता एवं सम्पूर्ण शुभचिन्तकहरुमा हार्दिक आभार प्रकट गर्न चाहन्छौँ ।