अमेरिका-नेपाली समाज टेक्सस (एनएसटी)को नयाँ नेतृत्वका लागि शनिबार भएको चुनावमा १५६४ मत मात्र खसेको छ । करिब २५१२ सय मतदाता रहेको एनएसटीमा तुलनात्मक रुपमा कम मत खसेको हो ।

यो कुल मतको करिब ६२ प्रतिशत हुन आउँछ । एनएसटीको नेतृत्वका लागि दुई समूहले प्यानल बनाएर चुनावमा होमिएका थिए । सामाजिक संस्थामा यसरी प्यानल बन्नुलाई कतिपयले मन पराएका थिएनन् ।

टेक्ससमा बस्ने नेपाली समुदायका लागि स्थापना भएको एनएसटी डलासमा केन्द्रित समाजिक संस्था हो । यस संस्थाको अध्यक्षमा वर्तमान अध्यक्ष राजेन्द्र वाग्लेले पुनः उम्मेदवारी दिएका थिए । संस्थाका पूर्व महासचिव कमल सत्यालले पनि अध्यक्षमा उम्मेदवारी दिएका थिए । दुवै प्रत्यासीले प्यानल बनाएका थिए ।

एनएसटीले टेक्ससमा आपत् विपतमा परेका नेपाली समुदायलाई सहयोग गर्दै आएको छ । यसबाहेक एक वर्षअघि अमेरिकाको ह्वाइट हाउसका पदाधिकारीसँग पनि समुदायका मुद्दाका बारेमा छलफल गरेको थियो ।

स्थानीय समयअनुसार ९ बजेबाट मत गणना सुरु गरिने निर्वाचन समितिले जनाएको छ । मध्येरातसम्म नतिजा आइसक्ने जनाइएको छ ।