ड्यालस (टेक्सस) । नेपाली समाज टेक्सास (एनएसटी)को नयाँ कार्यसमिति चयनको लागि आउँदो शनिवार (डिसेम्बर १६) निर्बाचन हुँदैछ । नयाँ नेतृत्व चयनको लागि हुन लागेको निर्बाचन स्वतन्त्र र निष्पक्ष रुपमा सम्पन्न गर्न प्रतिबद्ध रहेको निर्बाचन समितिले जनाएको छ ।

एनएसटी निर्बाचन समितिका सँयोजक बैकुण्ठबिक्रम थापाले बिहिबार बेलुकी जूम मार्फत पत्रकार सम्मेलनको आयोजना गरि डिसेम्बर १६ मा सम्पन्न हुने निर्बाचन सौहार्दपूर्ण वातारणमा सम्पन्न गर्न समुदाय र सरोकारवाला सबैले भूमिका खेल्नु पर्ने कुरामा जोड दिए ।

नेपाली समाज टेक्सस नेपाली समुदायको बृहत सहभागिता र सहयोगमा स्थापित सँस्था भएकोले यसको निर्बाचन लोकतान्त्रिक बिधिबाट सम्पन्न गरि सँस्थालाई सुदृढ बनाउनु पर्ने थापाले बताए ।

सँयोजक थापाका अनुसार निर्बाचनको लागि आबश्यक सबै तयारी अन्तिम चरणमा पुगेको छ । निर्बाचनमा २ हजार ५ सय १२ मतदाता रहेको भएपनि करिब २ हजारको आसपासमा मत खस्ने अनुमान गरिएको छ । निर्बाचनको लागि यही शनिबार बिहान ८ बजे देखि बेलुकी ७ बजेसम्म युलेसस्थित नेपाली साँस्कृतिक तथा अध्यात्मिक केन्द्र (पशुपति नाथ मन्दिर) सम्पन्न हुने र निर्बाचन सम्पन्न भएको २ घण्टामा मतगणना सक्ने गरि तयारी भईरहेको समितिले जनाएको छ ।

निर्वाचनमा नेपाली समाज टेक्ससका पूर्ब अध्यक्षहरु र नेपाली साँस्कृतिक तथा अध्यात्मिक केन्द्रका वर्तमान २ जना अध्यक्षबाट पर्यबेक्षण गराउने व्यवस्था मिलाईएको छ भने पत्रकारहरुलाई पनि निर्बाचनको समाचार सँकलनको लागि पासको व्यवस्था गरिएको सँयोजक थापाले जानकारी दिए ।

पत्रकारहरुले सोधेका बिभिन्न प्रश्नको जवाफ निर्बाचन कमिटीका सँयोजक बैकुण्ठबिक्रम थापा, सदस्य बिजयराज भट्टराईले दिए । नेपाली समाज टेक्सासको नयाँ नेतृत्को लागि हुन गईरहेको निर्वाचनमा वर्तमान अध्यक्ष राजेन्द्र वाग्ले र पूर्ब महासचिब कमल सत्यालले छुट्टा छुट्टै प्यानल बनाएर उम्मेदवारी दर्ता गराएका छन् ।

निर्वाचन समितिले बुधवार निर्वाचन आचारसंहिता जारी गरेको थियो । आचारसंहिता अनुसार विहिवारदेखि मौन अवधि सुरु भएको छ । मौन अवधिमा उम्मेदवारहरुलाई चुनावी प्रचारप्रसार गर्न निषेध गरिएको छ ।