ड्यालस (अमेरिका) । शनिबार अमेरिकाको टेक्सस राज्यको युलेसमा आयोजना गरिएको वृहद रक्तदान कार्यक्रममा एकै दिन एकसय २८ जनाले रगत दान गरेका छन् ।

नेपाली समाज टेक्सस स्थापना भएको २५ वर्ष पुगेको अवसरमा ब्लड डोनर्स अफ अमेरिका, सिटी अफ युलेस लगायत दुई दर्जनको हाराहारीमा रहेका संस्थाहरुको संयुक्त आयोजनामा शनिबार यो कार्यक्रम आयोजना गरिएको हो ।

विगतमा पनि रचनात्मक कार्यका लागि एकजुट हुने गरेको ड्यालस फोर्टवर्थको नेपाली समुदायले शनिबार अपूर्व सकृयता देखाएका कारण यति ठूलो रक्तदान कार्यक्रम सफल भएको हो ।

कार्यक्रममा नेपाली समाज टेक्ससका अध्यक्ष राजेन्द्र वाग्ले, नेपाली जनसम्पर्क समिति टेक्ससका अध्यक्ष ज्ञानेन्द्रबहादुर कार्की, बिडिएका बलराम पौडेल, बासु श्रेष्ठ, पशुपतिनाथ तथा बुद्ध मन्दिरका उपाध्यक्ष छबी चापागाई लगायतले रक्तदान गरेका थिए ।

कार्यक्रममा सिटी अफ युलेसकी मेयर लिण्डा मार्टिन, सिटी काउन्सिल सदस्य टीका पौडेल, बिडिए अमेरिकाका पूर्ब अध्यक्ष डा. नन्द रेग्मी लगायतको समेत सहभागिता थियो । कार्यक्रमलाई ऐतिहासिक रुपमा सफल बनाउन ड्यालस फोर्टवर्थमा रहेका नेपाली समुदायका सदस्यहरु निकै सकृयताका साथ खटेका थिए ।

रकतदानका लागि एकसय ३९ जनाले इच्छा जाहेर गरेर फर्म भरेका थिए । तर एकसय २८ जनामात्र रक्तदानका लागि योग्य ठहरिएका बिडिए अमेरिका टेक्सस च्याप्टर अध्यक्ष अजयराज बगाले ले बताए । युलेस सिटी लाइब्रेरीमा आयोजना गरिएको कार्यक्रममा कार्टर ब्लड सेन्टरले दुईवटा बस समेत व्यबस्थापन गरेको थियो ।