टेक्सस – नेपाली समाज टेक्ससका पूर्वअध्यक्ष स्व. कृष्ण लामिछानेको मृत्युपश्चात् समुदायमाझ प्रश्नमाथि प्रश्न निस्कन थालेका छन् । स्व. लामिछानेको मृत्युको पछाडि समुदायमा उत्पन्न यस्ता अनुत्तरित प्रश्नको उत्तर खोज्ने दायित्व पनि स्वयम् नेपाली समुदायकै रहेको छ ।
स्व. लामिछानेको मृत्युपश्चात् उनको अनुहारमा नीलडाम भएका तस्बिर सामजिक सञ्जालमा छरपष्ट देखिएका छन् भने अस्पष्ट भिडियोसमेत देखिएका छन् । यसरी देखिने भिडियो तथा तस्बिरहरूको बारेमा भने वास्तविकता बाहिर आउन सकेको छैन । यो कति समय अगाडिको हो भन्ने पनि प्रस्ट छैन । स्व. लामिछाने र उनको पत्नीबीच केही समयअगाडिबाट नै सम्बन्ध चिसिएको खबर बाहिरिएको थियो ।
फोटो र भिडियो बाहिरिएपछि अब कानुनी बाटो के हुन सक्छ भनेर धेरैले चासो प्रकट गरेका छन् । सम्बन्धित पक्षको कुरा नसुनी निर्णायक बन्न नहुने कयौँको तर्क छ । यद्यपि, जे-जस्तो भए पनि बाहिर आएजसरी शारीरिक यातनाजस्ता अमानवीय कार्य भए/गरेको पुष्टि भएमा पीडकलाई कारबाही गर्नुपर्ने सामाजिक संजालमा सबैले माग गरेका छन् ।
नेपाली समाज टेक्ससले अर्भिङ पुलिस डीपार्टमेन्टसँगको ईमेल कुराकानी सहितको रिपोर्ट सेयर गरेको छ , जसमा अर्भिङ पुलिस डीपार्ट्मेन्टले अनुसन्धान प्रारम्भिक चरणमा रहेको र यस बिन्दुमा त्यहाँ कुनै आपराधिक घटना भएको संकेत नभेटिएको जनाएको छ ।
यसैबीच, स्व. लामिछानेका बुवा रामप्रसाद लामिछानेले नेपालबाट अमेरिका आएर आफ्नो छोराको पार्थिव शरीर अन्तिम पटक हेर्ने इच्छा देखाएका छन् । हाल स्व. लामिछानेका बुवाको पासपोर्टको म्याद सकिएकाले नवीकरण गर्न केही समय लाग्ने जनाइएको छ । बुवाको इच्छा पूरा गर्नुपर्छ भन्दै स्व. लामिछानेको शनिबार हुन लागेको अन्त्येष्टि रोक्न समुदायको ठूलो जमात एकमत देखिएको छ । साथै, सो जमातले नेपाली समाजलाई शनिबार गर्न लागिएको अन्त्येष्टि रोक्न आग्रहसमेत गरेको छ । यधपी, अन्तेष्टि शनिबार नै हुने जनाईएको छ ।
समुदायमा हुने सही कार्यलाई प्रोत्साहन र गलतलाई हतोत्साह गर्नु पनि समुदायकै दायित्व हुने हुँदा यसतर्फ सबैले समयमै सचेत हुन जरुरी छ ।
यो पनि पद्नु होला
प्रतिक्रिया