ड्यालस (टेक्सस) । कोभीडको असरले सन् २०१९ मा रोकिएको आफ्नो विश्व साइकल यात्रालाई पोखराका अजित बरालले अमेरिकाबाट निरन्तरता दिन सुरु गरेका छन् ।

उनले गत महिना अमेरिकाको सूर्योदयको राज्यका नामले चिनिने फ्लोरिडाबाट विश्व साइकल यात्रा फेरि थालेका छन् । फ्लोरिडाको मायामीबाट साइकल यात्रा थालेका उनी १८ औं दिनमा टेक्ससको ड्यालस आइपुगेका छन् ।

ड्यालस आएका उनले आइतबार नेपाली समुदायसँग आफ्नो साइकल यात्राका बारेमा अनुभव शेयर गर्ने कार्यक्रम रहेको छ । आइतबार दिउँसो हस्र्टमा रहेको हब्र्स नेपाली रेष्टुरामा आफ्नो विश्व साइकल यात्राका बारेमा अनुभव शेयर गर्दैछन् ।

३५ बर्षिय बरालले अहिलेसम्म साइकलबाटै विश्वका ७० देशको यात्रा गरिसकेका छन् । सन् २०१५ मा नेपालको पूर्बी नाका काँडकभिट्टाबाट पानीट्यांकी हुँदै भारत प्रवेश गरेर उनको यात्रा सुरु भएको थियो । वातावरण संरक्षण प्रति जागरुक बनाउने यो साइकल यात्राको उद्वेश्य रहेको उनले बताए ।

नेपाल बाहेक ७० देशको यात्रा गर्दा उनले संसारका धेरै भूगोल देखे । धेरै मानिसहरुसँग कुराकानी गरिसकेका छन् । तर जहाँ जाँदा पनि आत्मियता मिलेको देखेर उनी असाध्यै खुशी छन् । सुरुको चरणमा पोखराकै शंकर पौडेल, पेशाले चिकित्सक अमृत बराल समेत भएर यात्रा सुरु गरेका थिए । सन् २०१६ मा अमेरिका आइसकेपछि भने अरु दुईले यात्रा टुंगाए । पौडेल जापानमा साइकल यात्रा गदैगर्दा दुर्घटनामा परेर अन्त्य गरे भने अमृतले अमेरिकाबाट समाप्त गरेर नेपालमै अहिले स्वास्थ सेवामा छन् ।

अजित भने यसपटक अमेरिकाको पूर्बदेखि पश्चिम र उत्तरदेखि दक्षिणको ७ हजार किलोमिटर यात्रा एकल रुपमा गर्नेगरि आएका छन् । यात्रा सुरु गरेको नवौ दिनमा बिहारको सीतामणीमा दुई साइकल चोरी भएको देखि लिएर कार्गो डुंगामा चढेर सात दिनमा माल्दिभ्स पुगेको, अनकंटार लाओसमा नेपाली भेटिएको देखि लिएर कम्बोडियाको अध्यागमनकै कर्मचारीले ५ सय डलर लुटेका जस्ता दर्जनौ घटनाहरु उनले भोगिसकेका छन् ।

लकडाउनको समयदेखि लिएर हालैका दिनसम्म नेपालमा रहँदा उनले लुकेका र संभावना भएका पर्यटकीय स्थानहरुमा साइकलबाटै यात्रा गरे । उनका अनुसार ती स्थानमा पनि पर्यटक पुर्याउन सकियो भने धेरै विदेशी मुद्रा आर्जन गर्न सकिन्छ ।

उनी साइकल यात्राको क्रममा जापानदेखि अष्ट्रेलिया, न्यूजील्याण्ड, फिजी, युरोपका अधिकांश देशहरु पुगिसकेका छन् । दक्षिण अमेरिकामा पर्ने अर्जेन्टिना, ब्राजिल। उरुग्वे लगायतका देशहरु पनि पुगिसकेका छन् । यसपटक अमेरिकाको ७ हजार किलोमिटर दुरी यात्रा गरेपछि क्यानडा र मेक्सिको जाने योजना उनले बनाएका छन् ।

दुर्घटनामा परेर शरिरको एकभाग नचल्ने उनी आँट गरेरै विश्वयात्रा निस्किएका हुन् । दैनिक औसत ७० देखि ८० माइल साइकल चलाउँछन् ।

यात्राको क्रममा म्यानपावरका दलालले कोरिया लगिदिने लोभ देखाएर लाओसमा पुर्याएका चितवनका युवा भेट्दा उनलाई ज्यादै खुशी पनि लाग्यो । तर उनको व्यथा सुन्दा नमिठो पनि लागेको उनले बताए ।