ड्यालस (अमेरिका) । रंगको पर्वका रुपमा मनाईने फागु पूर्णिमा अर्थात होली आइतबार अमेरिकाका बिभिन्न स्थानमा रहेका नेपाली समुदायले हर्षोल्लासका साथ मनाएका छन् ।

ड्यालसमा नेपाली समाज टेक्सस र इन्द्रेणी सांस्कृतिक संघको  संयुक्त होली

टेक्सस राज्यको ड्यालस, ह्युस्टन र अस्टिन लगायतका शहरहरुमा फागु पूर्णिमा अनेक रंग दलेर भव्य रुपमा मनाइएको समाचार हाम्रा स्थानीय संवाददाताहरुले पठाएका छन् ।

ड्यालसको ग्रेपभाइन लेक छेउमा नेपाली समाज टेक्सस र इन्द्रेणी सांस्कृतिक संघले संयुक्त रुपमा आयोजना गरेको फागु तथा होली पर्वमा विगतका बर्षहरुको भन्दा विशेष चहलपहल थियो ।

नेपालबाट आएका वृद्ध बा आमादेखि लिएर यहाँ बसोबास गर्दै आएका बिभिन्न उमेर समूहका व्यक्तिहरुले एक अर्कालाई रंग दलेर मनाए । त्यस अवसरमा बिभिन्न भेषभुषा तथा सांस्कृतिक झाँकी समेत प्रदर्शन गरिएको थियो ।

शनिबार पनि केही संगठनले फागु अर्थात होली पर्व मनाएको भएपनि आइतबार भने विशेष र अहिलेसम्मकै सबैभन्दा बढी सहभागिता भएको आयोजकहरुले दावी गरेका छन् ।

जहाँ भएपनि हामी नेपालीः नेप्लिज एशोसियसन अफ ह्युस्टनको आयोजनामा टेक्ससको ह्युस्टनमा फागु पर्वको रमझम

त्यस्तै आइतबारनै अमेरिकाको चौथो ठूलो शहर ह्युस्टनमा पनि फागु पर्व मनाईको छ । हाम्रा ह्युस्टन संवाददाता सुजन पण्डितका अनुसार मौसम राम्रो भएकोले सर्वसाधारणहरु एक ठाउँमा जम्मा भएर होली पर्व भव्यताका साथ मनाएका थिए ।

उता टेक्ससको राजधानी शहर अस्टिनमा पनि नेपाली समुदायले होली पर्व मनाएको स्थानीय संवाददाता भीषण न्यौपानेले जनाएका छन् । उनका अनुसार ग्रेटर अस्टिन नेपाली सोसाइटी (ग्यान्स) को आयोजना भएको होलीमा ५ सयको हाराहारीमा नेपाली समुदायको सहभागिता थियो ।

टेक्ससको राजधानी अस्टिनमा ग्यान्सले आयोजना गरेको होली २०२३