ड्यालस (टेक्सस) । नेपाली समुदायको सकृयतामा ड्यालस फोर्टवर्थ मेट्रोप्लेक्स अन्तरगत पर्ने युलेस सिटीमा निर्माणाधिन मन्दिरमा शुक्रबार गजुर प्रतिस्थापन कार्य सम्पन्न भएको छ ।

हाल अर्भिंग सिटीमा रहेको मन्दिरलाई भव्य संरचना सहित युलेसमा स्थानान्तर गर्ने क्रममा पहिलो चरणको निर्माण कार्य अन्तिम चरणमा पुगेको छ । युलेस सिटीबाट केही सुपरिवेक्षण बाँकी रहेको र त्यो पुरा हुनासाथ अर्भिंगमा रहेको मन्दिर युलेस सर्नेछ ।

शुक्रबार युलेसको मन्दिरको मुलद्वारमा तीनवटा गजुर प्रतिस्थापन गरियो । मन्दिरका मुल पुजारी डा. शेखरप्रसाद पण्डित, पुजारी मेघराज निरौलाले विधिवत रुपमा पूजा गरेर गजुर प्रतिस्थापन गरिएको थियो ।

कार्यक्रममा मन्दिरका पदाधिकारीहरु, पूर्व पदाधिकारीहरु लगायत स्थानीय समुदायको उपस्थिती रहेको थियो । अर्भिंगको भन्दा ठूलो क्षेत्रफल, प्रशस्त पार्किंग रहेको र भविष्यमा पशुपतिनाथकै जस्तो मन्दिर तथा ध्यान गर्न मिल्ने गुम्बज सहितको स्तुपा बनाउने योजनामा नेपाली सांस्कृतिक तथा आध्यात्मिक केन्द्र रहेको छ ।

सिटीबाट बाँकी सुपरिवेक्षण भैसकेपछि छिटै मन्दिर सार्ने योजना रहेको छ । त्यतिन्जेलसम्मका लागि अर्भिंगकै मन्दिरबाट साविक बमोजिमका कामहरु हुनेछन् । भवन भित्र र बाहिरका सबै निर्माणकार्य पुरा भैसकेका छन् । ढिलोमा अप्रिल र चाँडोमा यहि मार्च महिनाभित्रमा मन्दिरको नयाँ ठेगाना युलेस भैसक्ने संभावना रहेको मन्दिरका पदाधिकारीहरुले अनौपचारिक रुपमा बताए ।