रत्ननगर । रत्ननगर नगरपालिकाका नगरप्रमुख प्रल्हाद सापकोटाले बागमती प्रदेश सरकारको सशर्त अनुदान र नगरपालिकाको बजेटमार्फत रत्ननगर–२ मा निर्माणाधीन फुटपाथसहितको सडक तथा नालाको अनुगमन तथा निरीक्षण गर्दै गुणस्तरयुक्त निर्माण सामग्रीको प्रयोग गर्न ठेकेदार कम्पनीलाई निर्देशन दिएका छन् ।

नगरप्रमुख सापकोटाले विकास निर्माणका आयोजनाहरुमा ढिलाइ गर्ने, लापर्बाही गर्ने र राजनीति गर्न खोज्नेलाई नगरपालिकाले कडारूपमा कारबाही गर्ने चेतावनीसमेत दिए । ‘विकास निर्माणमा अवरोध पु¥याउन खोज्ने र पु¥याउने दुवैलाई कारबाही हुन्छ’, उनले भने, ‘विकासका काममा कुनै पनि बहानामा ढिलासुस्ती गर्न पाइँदैन ।’

रत्ननगर–२ को रत्ननगर बकुलहर अस्पतालदेखि सुब्बाचोकसम्म फुटपाथसहितको सडक तथा नाला निर्माणको लागि इन्द्रदेवी–हरि जेभीसँग कुल २ करोड ३६ लाख ८८ हजार ३४२ रुपैयाँमा माघ २१ गते ठेक्का सम्झौता भएको हो ।

बागमती प्रदेश सरकारबाट स–शर्त अनुदान स्वीकृत भई आएको बजेट ५० लाख र नगरकार्यपालिकाको बैठकबाट चालू आर्थिक वर्षको अन्य विविध सार्वजनिक निर्माण शीर्षकमा विनियोजित रकममध्ये २ करोड १० लाख खर्च व्यहोर्नेगरी भएको निर्णयअनुसार कुल २ करोड ६० लाख विनियोजित बजेटमार्फत फुटपाथसहितको नाला निर्माण गरिन लागेको हो ।

चालू आर्थिक वर्ष २०७९/०८० मा सञ्चालन हुने गरी कार्यपालिकाको २०७९ असोज ५ गतेको बैठकबाट निर्णय भई नेपाल सरकार सार्वजनिक खरिद ऐन, २०६३ र सार्वजनिक खरिद नियमावली, २०६४ मा व्यवस्था भएबमोजिम सो आयोजनाको लागि विद्युतीय सिलबन्दी बोलपत्र सूचना आह्वान् गरिएको थियो ।

नगरको सो आयोजनाका लागि स्थानीयले स्वतःस्र्फूत सडक क्षेत्रभित्र पर्ने स्थायी/अस्थायी संरचना हटाएर नगर आयोजनालाई सहयोग गरेका छन् । सो आयोजनाअन्तर्गत ४६३ मिटर लम्बाइको सडक निर्माण हुनेछ । जसमा आठ मिटर कालोपत्रे र दुवैतर्फ डेढ/डेढ मिटरको फुटपाथ र नालासहित कुल ११ मिटर चौडाइको सडक निर्माण हुने रत्ननगर नगरपालिकाका इन्जिनियर पंकज गिरीले जानकारी दिए ।

सो आयोजनाको अनुगमनमा इन्जिनियर पंकज गिरी, रत्ननगर न्यायिक समितिका सदस्य देवेन्द्र भुजेल, रत्ननगर खानेपानी उपभोक्ता समितिका अध्यक्ष माधव अर्याललगायतको सहभागिता रहेको थियो ।