सोल । उत्तर कोरियाले बुधबार समुद्रमा ब्यालेस्टिक मिसाइल प्रहार गरेको दक्षिण कोरिया र जापानले जनाएको छ । प्योङयाङले यस वर्ष यो पहिलो पटक प्रक्षेपण गरेको हो । 

 

उत्तरले कोरियाले प्रायद्वीपको पूर्वी समुद्रतर्फ स्थानीय समयअनुसार मङ्गलबार बिहान ८ः१० बजे ‘ब्यालेस्टिक मिसाइल’ प्रहार गरेको दक्षिण कोरियाली सेनाले जनाइएको छ ।

 

एक आपतकालीन बैठकपछि दक्षिण कोरियाको राष्ट्रिय सुरक्षा परिषदले यस मिसाइल परिक्षणको चिन्ता व्यक्त गरेको राष्ट्रपतिको कार्यालयद्वारा जारी विज्ञप्तिमा जनाइएको छ । 

 

यसलाई सम्भावित ब्यालेस्टिक मिसाइल प्रक्षेपणको रूपमा वर्णन गरे पनि उत्तर कोरियाले गरेको लगातार क्षेप्यास्त्र प्रक्षेपण साँच्चै खेदजनक भएको जापानी प्रधानमन्त्री फुमियो किशिदाले बताएका छन् ।  

 

जापान सरकारका प्रवक्ता हिरोकाजु मात्सुनोले पत्रकारहरूलाई अहिलेसम्म जापानी विमान र जहाजहरूमा क्षति पुगेको कुनै समाचार नआएको बताएका छन् । यो प्रक्षेपण गत हप्ता किमको भाषणपछि भएको थियो जसमा उनले उत्तर कोरियाले आफ्नो सैन्य क्षमताको निर्माण जारी राख्ने बताएका थिए ।   

 

उत्तर कोरियाले समुद्रमा बलिस्टिक क्षेप्यास्त्र प्रक्षेपण गरेको दक्षिण कोरियाको रक्षामन्त्रीले पुष्टि गरेका छन् । दक्षिण कोरिया सरकारले पुष्टि गर्नुअघि प्रक्षेपणबारे जापानी तटरक्षक निकायले समुद्रमा पहिलो पटक जानकारी दिएको थियो ।

 

संयुक्त राष्ट्रसङ्घले उत्तर कोरियालाई बलिस्टिक र परमाणुअस्त्र परीक्षण गर्न प्रतिबन्ध लगाए पनि उत्तर कोरियाद्वारा यस प्रतिबन्धको पालना गरेको पाइँदैन । 

 

दक्षिण कोरियाली र अमेरिकी गुप्तचर निकायले थप विवरणहरूको विश्लेषण गरिरहेका दक्षिण कोरियाको जोइन्ट चिफ अफ स्टाफ (जेसिएस) ले जानकारी गराएको छ । 

 

 

संयुक्त राज्य अमेरिकाले बुधबार उत्तर कोरियाले शंकास्पद ब्यालेस्टिक क्षेप्यास्त्र प्रहार गरेको भन्दै यसप्रति गम्भीर चासो व्यक्त गरेको छ । साथै, उत्तर कोरियाली अधिकारीलाई भड्किलो गतिविधि त्याग्न र वार्तामा बस्न प्योङयाङलाई आग्रह गरेको छ ।

 

“यो प्रक्षेपण संयुक्त राष्ट्र सुरक्षा परिषदका धेरै प्रस्तावनाहरूको उल्लङ्घन हो र यसले उत्तर कोरिया छिमेकीहरू र अन्तरराष्ट्रिय समुदायको लागि खतरा उत्पन्न गर्छ,”अमेरिकी विदेश मन्त्रालयका एक प्रवक्ताले बताए ।

 

उनले भने, “हामी उत्तर कोरियासँगको कूटनीतिकसम्बन्ध कायम गर्ने दृष्टिकोणप्रति प्रतिबद्ध छौँ र वार्तामा सहभागी हुन आह्वान गर्दछौँ ।” एजेन्सी