ड्यालस (टेक्सस) । जनप्रगतिशील मञ्च अमेरिकाको अध्यक्षमा तिलक केसी चयन भएका छन् । शनिबार भएको मञ्चको पहिलो अधिवेशनले विसकन्सिन राज्यको मिलवाकी निवासी केसी अध्यक्षमा चयन भएका हुन् । 

 

केसी अमेरिकाको नेपाली समुदायमा चिरपरिचित सामाजिक अभियन्ताका साथै व्यवसायी पनि हुन् । केही महिनाअघि सम्पन्न एनआरएनए अमेरिकाको निर्वाचनमा केसी अध्यक्षका उम्मेदवार थिए । 

 

विगत २० वर्षदेखि अमेरिकामा बस्दै आएका केसी सन् २०१९/२१ मा एनआरएनए अमेरिकाको बोर्ड अफ डाइरेक्टरमा रहेर काम गरिसकेका छन् । नेपालको राजनीतिक दल नेकपा माओवादी निकटका रुपमा धेरैले जनप्रगतिशील मञ्चलाई चिन्ने गरेका छन् ।

 

भर्चुअल प्रक्रियाबाट भएको अधिवेशनमा माओवादी प्रवास कमिटीका सहइन्चार्ज लक्ष्मण पन्त, सचिव ओम शर्मा, टिबी पाठक समेतको सहभागितामा भएको अधिवेशनले १५ सदस्यीय कार्यसमिति निर्विरोध चयन गरेको हो । समितिको उपाध्यक्ष, महासचिव, सचिव र कोषाध्यक्षमा क्रमशः बाबुराम सापकोटा, माथबरसिंह रावत, टंकराज रेग्मी, होताराम बिक छानिएका छन् ।

 

त्यस्तै सदस्यहरुमा विजय ज्ञवाली, जगन निरौला, हरि पराजुली, निर्मल पाण्डे, विश्व राई, शिव पहाडी, मोहन कुसारी, गोरख कुसारी, सम्झना खनाल र हरि गौतम चयन भएका छन् ।

 

‘साथीहरुले मलाई विश्वास गरेर संस्थाको जिम्मेवारी दिनुभएको छ । यसको लागि आभारी छु । अमेरिकी कानुनलाई मान्दै मातृभूमिको हितमा सकेको सहयोग गर्ने मेरो मुख्य लक्ष्य हुनेछ’ अध्यक्ष केसीले हिमालय खबरसँग भने ।

 

 

यसैबीच, केसी नेतृत्वमा सार्वजनिक भएको कार्यसमितिप्रति असन्तुष्टि जनाउँदै मधुसागर पौडेलको नेतृत्वमा जनप्रतिशिल मञ्च अमेरिकाको अर्को कार्यसमिति सार्वजनिक भएको छ । 

 

पाँच वर्षदेखि सिकागोमा बस्दै आएका पौडेल नेतृत्वको कार्यसमितिमा उपाध्यक्ष, महासचिव, सचिव र कोषाध्यक्षमा क्रमशः टंक (महेश) रेग्मी, विनोद कुइँकेल, बलराम पोखरेल र मोहन कुसारी चयन भएको सार्वजनिक गरिएको छ । 

 

त्यस्तै, सदस्यहरुमा ईश्वरी दवाडी, गोरख कुसारी, नारायण खड्का, प्रदीप चौलागाई, लक्ष्मी सुवेदी शर्मा, युवराज केसी, महेन्द्र अधिकारी, मञ्जु ढुंगाना, मित्रमणि घिमिरे, राजु गुरुङ्ग र विकास कँडेल रहेका छन् । यो समितिको सल्लाहकारमा नारायण कँडेल, काशीनाथ पौडेल र मणि चौलागाई रहेका छन् ।

 

पहिलो अधिवेशनबाटै संस्थामा विवाद भएर दुईवटा समिति गठन हुनुलाई धेरैले सहजरुपमा लिएका छैनन् । ‘केन्द्रको अस्वाभाविक हस्तक्षेपलाई हामी अमेरिकामा बस्नेले नमानेका हौँ’ पौडेल नेतृत्वमा सार्वजनिक समितिका महासचिव कुइँकेलले भने । केही व्यक्तिहरुले भाँडभैलो गरेको आरोप समेत उनले लगाए । 

 

समितिका अध्यक्ष केसीले भने अधिवेशनको पुरै समय बसेर केही साथीहरु पछि बाहिर निस्किसकेपछि अनावश्यक बखेडा झिकेको प्रतिक्रिया दिए ।