राजनीति-समाज

राप्रपा नफुट्ने गरी एकता महाधिवेशन : अध्यक्षत्रय

प्रकाशित |
काठमाडौँ । राष्ट्रिय प्रजातन्त्र पार्टी (राप्रपा) का नेताहरुले फेरि दल नफुट्ने गरी एकताबद्ध बनाएर अघि बढ्न एकता महाधिवेशन आयोजना गरिएकामा जोड दिएका छन् । 
 
पार्टीको एकता महाधिवेशन उद्घाटन समारोहलाई मंगलबार सम्बोधन गर्दै अध्यक्ष पशुपतिशम्शेर जबराले दललाई एकताबद्ध बनाइराख्न आफू अध्यक्षको उम्मेदवार नहुने निर्णयमा पुगेको जानकारी दिए ।
  
“मैले जितेपछि पार्टी फुट्यो भने तीतो अनुभव हुन्छ, यसैले अध्यक्ष पदमा उम्मेदवार बन्दिनँ, अध्यक्ष दाबेदार मित्र कमल थापा र राजेन्द्र लिङ्देनलाई पनि सर्वसम्मतरूपमा अध्यक्ष निर्वाचित गरेर एकताको सन्देश दिन आह्वान गर्छु, सम्भव भएन भने प्रजातान्त्रिक प्रक्रियाबाट आउने परिणामलाई सबैले मान्नुपर्छ”, उनले भने ।
 
पार्टीका अर्का अध्यक्ष डा प्रकाशचन्द्र लोहनीले दलमा एकता महाधिवेशनले फुटको अन्त्य भई एकताबद्ध भएर अघि जाने वातावरण बन्नेमा आफू विश्वस्त रहेको बताए । “नेपाललाई एकताको सूत्रमा बाँध्न पृथ्वीनारायण शाहका दिव्योपदेशको बाटो अर्थात् पृथ्वीपथ चाहिन्छ, पृथ्वीनारायण शाहले धर्मप्रचारका माध्यमबाट नेपालमा अनेकता ल्याउन खोज्ने पोर्चुगिज पादरीलाई फिर्ता गर्नुभएको थियो, विभिन्न नाममा आउने विदेशीले नेपालमा अनेकता फैल्याउन काम गरेका छन्”, उनले भने । 
 
नेपालमा राजनीतिक विकासमात्र भई विकासका लागि राजनीति नभएकाले यसतर्फ सबै दलले चिन्तन गर्नुपर्ने पूर्वमन्त्रीसमेत रहेका अध्यक्ष लोहनीको भनाइ थियो । नेपाललाई वैदिक सनातन हिन्दू राष्ट्र घोषणा गरी धार्मिक पर्यटन प्रवद्र्धनका माध्यमबाट अर्थतन्त्रको विकासमा योगदान गर्न सकिनेमा उनले जोड दिए ।
 
त्रय अध्यक्षमध्येका एक कमल थापाले दलको यो अन्तिम एकता महाधिवेशन हुने बताउँदै यसका लागि तीनै जना अध्यक्षले पार्टी फुट्न नदिने सङ्कल्प गरेको सुनाए । पार्टी नटुक्र्याउन तीनै जना अध्यक्षले गीता छोएर कसम खाएको अध्यक्ष थापाले महाधिवेशन उद्घाटन समारोहमा जानकारी गराए । देशलाई अहिले पनि विसं २०३३ मा बिपी कोइरालाले प्रतिपादन गरेको राष्ट्रिय एकता र मेलमिलापको नीतिको आवश्यकता रहेको उनले बताए । 
 
“नेपाली पहिचानको रक्षा हुने प्रजातन्त्रको आवश्यकता छ, प्रजातान्त्रिक मूल्यमान्यता कमजोर हुँदै गएको छ, सबै नेपाली अटाउने मौलिक प्रजातन्त्रको आवश्यकता छ, विदेशीको हस्तक्षेप बढ्दै गएको छ, राज्यका अङ्ग कमजोर हुँदै गएका छन, धर्म निरपेक्षताका नाममा सनातन धर्म, संस्कृतिमाथि आक्रमण भएको छ”, अध्यक्ष थापाले भने ।
 
पार्टीका संस्थापक अध्यक्ष एवं पूर्वप्रधानमन्त्री लोकेन्द्रबहादुर चन्दले अन्यायले न्यायलाई छोप्ने प्रवृत्ति बढ्दै जाँदा जनता असन्तुष्ट भएकाले न्यायपूर्ण समाज निर्माण गर्ने गरी राप्रपाले प्रस्ताव पारित गर्न सुझाव दिए । देश र जनताका लागि हिन्दू राष्ट्र र राजसंस्था आवश्यक रहेको उनको भनाइ थियो ।
 
राप्रपाका तर्फबाट निर्वाचित सांसद राजेन्द्र लिङ्देनले हिन्दू राष्ट्र र राजसंस्थाका पक्षमा जनता हुँदा पनि पार्टी राष्ट्रिय दल बन्न नसक्नुमा नेतृत्वको कमजोरी रहेको बताए । राप्रपालाई राष्ट्रिय दलका रूपमा स्थापित गर्न कार्यकारिणी फेरिनुपर्ने उनको भनाइ थियो । 
  
कार्यक्रममा वाग्मती प्रदेशसभा सदस्य रीना गुरुङले सङ्घीयता र गणतन्त्र शरीरको एपेण्डिक्स जस्तै बनेको भन्दै विदेशीको खेलमैदान हुनबाट देशलाई बचाउन सबै दल एकजुट हुनुपर्नेमा जोड दिइन् । राप्रपा महामन्त्री भाष्कर भद्रा, बारा जिल्ला अध्यक्ष गिरीधारीप्रसाद चौधरीलगायतले सनातन हिन्दू राष्ट्र र राजसंस्था पुनःस्थापना हुनुपर्नेमा जोड दिएका थिए । 
 
सो अवसरमा पूर्वगृहमन्त्री निरञ्जन थापा र पार्टी नेता डा गोविन्दराज खनियाँले लेख्नुभएको पार्टी एवं त्यसमा आफूहरुको योगदानका विषयमा लेखिएका पुस्तक अध्यक्षत्रयले विमोचन गरेका थिए । हिन्दू राष्ट्रको मुद्दालाई प्रमुखरूपमा उठाउँदै आएको पार्टीको एकता महाधिवेशन नेपाल वेद विद्याश्रमका बटुकद्वारा स्वस्ति वाचन गरी सुरु भएको थियो ।
 
तीन दिनसम्म चल्ने महाधिवेशनले नयाँ नेतृत्व चयन गर्ने जनाइएको छ । उद्घाटनपछि आजै बेलुकी बन्दसत्र सुरु हुने जानकारी दिइएको छ । रासस

हिमालय खबर

हिमालय खबर -

थप »

यो खबर पढेर तपाईलाई कस्तो महसुस भयो ?

प्रतिक्रिया