धादिङ । धादिङको नीलकण्ठ नगरपालिका–६ सुनौलाबजारमा कोरोना भाइरसविरुद्धको खोप लगाएको केही बेरमा एक वृद्धको मृत्यु भएको छ । अमेरिकन कम्पनी जोनसन एण्ड जोनसनद्वारा उत्पादित एक मात्रा लगाए पुग्ने खोप लगाएका ७८ वर्षीय नरबहादुर श्रेष्ठको खोप लगाएको आधा घन्टापछि मृत्यु भएको आफन्तले बताएका छन् ।
खोप लगाएको केही बेरमा बृद्धको मृत्यु भएको विषय बाहिर आएपछि धादिङ अस्पतालका मेडिकल सुपरिटेन्डेन्ट डा. त्रिभुवनचन्द्र झाले सो घटना अनुसन्धानको विषय भएकोले यसै भएको हो भन्न नसकिने बताएका छन् । श्रेष्ठको मृत्यु प्राकृतिक कारणले गर्दा भएको हो या कोरोना खोपको असरले हो भन्ने बारेमा शवको पोस्ट मार्टम रिपोर्ट हेरेर मात्र जवाफ दिन सकिने डा. झाले बताए ।
श्रेष्ठको शव पोस्ट मार्टमका लागि धादिङ अस्पतालमा राखिएको छ । घरबाट नजिकै रहेको सुनौला बजार स्वास्थ्यचौकीमा रहेको खोप केन्द्रमा हिँडेरै पुगेका श्रेष्ठ खोप लगाएपछि आधा घन्टासम्म खोप केन्द्रमै बसेका थिए । त्यसपछि हिँडेरै घर पुगेको केही बेरमा ढलेपछि तत्काल उपचारका लागि जिल्ला अस्पताल लगिएको हो ।
अस्पताल पु¥याउँदा श्रेष्ठको मृत्यु भइसकेको आफन्तले बताए । शुक्रबार धादिङको स्थानीय तहहरुले खोप कार्यक्रम सञ्चालन गरेका थिए । सोही क्रममा नीलकण्ठ नगरपालिकाले वडा नम्बर ६ स्थित सुनौलाबजार स्वास्थ्यचौकीमा खोप कार्यक्रम सञ्चालन गरेको थियो ।
प्रतिक्रिया