काठमाडौँ । नेकपा एमालेका वरिष्ठ नेता माधवकुमार नेपालले प्रधानमन्त्री शेरबहादुर देउवालाई आफूहरु साथमै रहेकाले जनतालाई आशा जगाउने काम गरर अघि बढ्न सुझाव दिएका छन् । नेता नेपाललाई भेट्न प्रधानमन्त्री देउवा नेपाल निवास कोटेश्वरमा पुगेका थिए ।
उनले आफूहरुले रिटमा नै पूर्ण संसदका लागि माग गरेको भन्दै विश्वासको मत दिने कि नदिने भन्ने त्यसमै उल्लेख गरिएको बताए । उनले आफूहरु साथमै रहेकोले देउवालाई विश्वासको मत दिन तयार रहेको आश्वासन दिए ।
“रिटमा जे माग गरेका छौँ त्यो पूरा भएको छैन । यो संसदलाई पूरा कार्यकाल चल्न दिन वैकल्पिक सरकार खोजेको हो,” उनले भने, “त्यसका लागि गठबन्धन जन्मिएको हो । गठबन्धनले संसद्को पूर्ण आयूका लागि काम गर्नेछ ।”
संविधानको धारा ७६(५) अनुसार देउवाले प्रधानमन्त्रीमा दाबी गर्न एमालेका २८ सांसदले हस्ताक्षर गरेका थिए । तर उनी र केपी शर्मा ओली दुबैको दाबी नपुगेको भन्दै प्रतिनिधिसभा भंग भएपछि देउवालाई प्रधानमन्त्री नियुक्त गर्न परमादेशको माग गर्दै सर्वोच्च अदालत गएका १४६ सांसदमा नेपाल समूहका २३ सांसद थिए ।
सोही मुद्दामा सोमबार फैसला सुनाएको सर्वोच्चले संसद पुनस्र्थापना गर्नुका साथै देउवालाई प्रधानमन्त्री नियुक्त गर्न परमादेश दिएको थियो ।
सर्वोच्चले प्रधानमन्त्री नियुक्तिका लागि समर्थन गर्दा वा विश्वासको मत दिँदा हृवीप नलाग्ने र दल त्यागसम्बन्धी कारबाही नहुनेसमेत फैसला गरेको छ । फैसलाअनुसार २९ असारमा प्रधानमन्त्री नियुक्त भएका देउवाले संविधानअनुसार ३० दिनभित्र विश्वासको मत लिनुपर्ने हुन्छ ।
जसका लागि माधवकुमार समूहको समर्थन चाहिन्छ । बुधबारै नेकपा एमालेका अध्यक्ष एवं निवर्तमान प्रधानमन्त्री केपी शर्मा ओलीले पार्टीका वरिष्ठ नेता माधवकुमार नेपाललाई अब एमालेमा कुनै ठाउँ नभएको भन्दै आक्रोश पोखेका छन् ।
ओलीको कथनले एमाले एकता संकटमा परेको बुझ्न सकिन्छ । ओलीले नेता नेपाललाई गद्दार घोषणा गर्दै क्षमा दिन नसकिने बताउनुले पनि नेता नेपालको समर्थन र विश्वासको मत देउवाले पाउने देखिन्छ । किनभने, देउवा सरकारको स्थायित्व नेता नेपालको साख पनि हो ।
प्रतिक्रिया