चितवन । पूर्वी चितवनको राप्ती–३, प्रगतिनगरकी सुजिता भण्डारीको अपहरणपछि हत्या गरिएको भन्दै उनका आफन्त तथा स्थानीयवासीले न्याय माग्दै सडक अवरुद्ध गरेका छन् । ११ दिनअघि घरबाटै बेपत्ता भएकी सुजिताको न्यायका लागि आफन्त र स्थानीयवासीले नौ घन्टासम्म पूर्वपश्चिम राजमार्गमा अवरुद्ध गरेका हुन् ।
बेपत्ता भएको दसौँ दिनमा आइतबार साँझ वडा नं ३, धमिलीमा रहेको जयश्री ब्रह्मस्थानी सामुदायिक वनमा सुजिताको शव फेला परेको थियो । प्रहरीले घटनास्थलबाट १३ घन्टापछि सोमबार बिहान ९ बजे शव उठाएको थियो ।
सुजिताको शव फेला परेपछि आक्रोशित बनेका आफन्त र स्थानीयवासीहरुले उनको शवलाई अस्पताल लैजान दिएका थिएनन् । पूर्व–पश्चिम राजमार्गको झुरझुरे चोकमा राजमार्ग बन्द गरी स्थानीयवासीले अवरोध सिर्जना गरेका थिए । २४ घन्टाभित्र हत्यारा पत्ता लगाउने लिखित प्रतिबद्धता नआएसम्म शव लैजान नदिने भन्दै आफन्त तथा स्थानीयवासीहरुले झुरझुरेमै शव रोकेका थिए ।
घटनास्थलबाट ग २ च ९३२८ नम्बरको एम्बुलेन्समा सुजिताको शव ल्याइएको थियो । आफन्त र स्थानीयको अवरोधका कारण आइतबार दिनभरि सुजिताको शव एम्बुलेन्समै राखिएको थियो । सुजिताको अपहरण गरी हत्या गरिएको भन्दै बुबा यज्ञप्रसाद भण्डारी, आमा अम्बिका भण्डारी, दिदी कविता भण्डारी र भाइ रिजन भण्डारीसहित हजारौँँ स्थानीयवासीले सडक अवरुद्ध पारेका थिए ।
आन्दोलित बनेका आफन्त र स्थानीयवासीहरुले हत्यारामाथि कारबाहीको माग गर्दै बेपत्ता भएको लामो समयसम्म पनि प्रहरीले अवस्था पत्ता लगाउन नसकेको भन्दै प्रहरी प्रशासनविरूद्ध चर्को नाराबाजीसमेत गरेका थिए ।
प्रहरीले शवको पोस्ट मार्टम नगरी मृत्युको कारण यकिन गर्न नसकिने बताए पनि आफन्त र स्थानीयवासीले भने सुजिताको अपहरणपछि हत्या गरिएको दाबी गरेका हुन् । सुजिताका बुबा यज्ञप्रसाद भण्डारीले सुजिताको आत्मशान्तिका लागि पनि हत्यारालाई हदैसम्मको कारबाही हुनुपर्ने बताए । उनले छोरी हराएकै दिन प्रहरीलाई खबर गर्दा पनि चासोपूर्वक प्रहरीले खोजी कार्य नगरेको आरोप लगाएका छन् ।
आफन्त र स्थानीयवासीले शव सडकमै राखेर आन्दोलन गरेपछि पोस्ट मार्टमका लागि शव भरतपुर लैजान र अवरूद्ध सडक सञ्चालन गर्न प्रमुख जिल्ला अधिकारी प्रेमलाल लामिछाने, राप्तीकी मेयर प्रभा बराल, उपमेयर इमानसिंह लामा, एसपी ओमप्रसाद अधिकारीसहित सर्वपक्षीय बैठक बसेको थियो ।
बैठकमा घटनाको सत्यतथ्य छानबिन गर्ने, अपराधीको तत्काल खोजी गरी कारबाही गर्ने र पीडित परिवारलाई राहत उपलब्ध गराउन सरकारसँग पहल गर्ने निर्णय भएको थियो । शवको पोस्ट मार्टम नगरी सत्यतथ्य पत्ता नलाग्ने भएकाले पोस्ट मार्टम गरेर घटनाको बारेमा थाहा पाउन सहयोग गर्नुपर्ने बताउँदै मेयर प्रभा बरालले तत्काल अपराधी पत्ता लगाउन र दोषीलाई हदैसम्मको कानुनी कारबाही गर्न प्रहरी प्रशासनलाई आग्रह गरेको बताइन् ।
दोषीलाई कानुनी कठघरामा उभ्याउन कांग्रेसको माग
नेपाली कांग्रेसले पूर्वी चितवनको राप्ती नगरपालिकाकी युवती सुजिता भण्डारीको रहस्यमय ढंगले भएको मृत्युले गम्भीर आशंका जन्माएको जनाएको छ ।
साथै, ९ दिनसम्म उनी नभेटिनु, कसैको नियन्त्रण र अपहरणमा परेको सूचना उनले दिएपछि पनि खोज अनुसन्धानले परिणाम हासिल नगर्नु तथा अन्तिममा जङ्गलमा मृत शरीर भेटिनुले अनेक प्रश्न उब्जिएको कांग्रेसको भनाइ छ ।
कांग्रेस प्रवक्ता विश्वप्रकाश शर्माले सोमबार विज्ञप्तिमार्फत सुजिता प्रकरणको गहिरो र गम्भीर अनुसन्धानमार्फत दोषीलाई अविलम्ब कानुनी कठघरामा उभ्याउन सरकारसँग माग गरेका छन् । मुलुकका विभिन्न भागमा महिलाउपर अनेक प्रकृतिका हिंसा र हत्याका घटना पटकपटक भएको उल्लेख गर्दै प्रवक्ता शर्माले यो प्रवृत्तिलाई निरूत्साहित गर्न तथा सामाजिक परिवर्तनका लागि गम्भीर राष्ट्रिय विमर्श गर्न जरूरी भइसकेको जनाएका छन् ।
घटनाको गहिरो अनुसन्धान र कारबाहीका लागि राज्य प्रशासनको गम्भीर तदारूकता पनि झनै विशेष बन्न बनाउन अत्यावश्यक भएको उल्लेख गर्दै उनले चितवनको घटनाको गहिराइसम्म पुगेर अनुसन्धान गर्न माग गर्दै यसमा सबैको ध्यानाकर्षण गराएका छन् ।
गृहमन्त्रीलाई ज्ञापनपत्र
यसैबीच, सुजिताको मृत्यु प्रकरणले चितवनमात्र तातेको होइन, गृहमन्त्री विष्णु पौडेलको समेत ध्यानाकर्षण गराउँदै तत्काल ‘हत्यारा’लाई कारबाही गर्न माग गरिएको छ । चिल्डे«न भिजन नेपालले सोमबार गृहमन्त्री पौडेललाई ज्ञापनपत्र बुझाउँदै दोषीलाई तत्काल कारबाही गर्न माग गरेको छ ।
भिजन नेपालका अध्यक्ष रमेश सिलवालद्वारा हस्ताक्षर गरिएको ज्ञापनपत्रमा दोषीलाई तत्काल पक्राउ गरी हदैसम्मको सजाय गर्न माग गरिएको छ । विज्ञप्तिमा पीडितलाई राहतको व्यवस्था गरी महिलाको बाँच्न पाउने अधिकार सुनिश्चित गर्नसमेत माग गरिएको छ ।
प्रतिक्रिया