नयाँ दिल्ली । भारतमा कोरोनाभाइरस महामारी (कोभिड–१९) बाट संक्रमितमध्ये विगत २४ घन्टामा थप तीन हजार २०७ जनाको मृत्यु भएको छ । योसहित भारतमा कोभिड–१९ संक्रमितमध्ये तीन लाख ३५ हजार १०२ जनाको ज्यान गइसकेको छ ।
केन्द्रीय स्वास्थ्य तथा परिवार कल्याण मन्त्रालयका अनुसार विगत २४ घन्टामा एक लाख ३२ हजार ७८८ जना नयाँ संक्रमित थपिएका छन् । योसहित भारतमा बुधबारसम्म कुल संक्रमितको संख्या दुई करोड ८३ लाख नाघेको छ ।
तर, संक्रमितमध्ये दुई करोड ६१ लाख ७९ हजार निको भएका छन् । अझै १७ लाख ९३ हजार व्यक्ति सक्रिय संक्रमित अवस्थामै रहेका छन् । तर यो संख्या विगत २४ घन्टामा एक लाखले कमी आएको हो । मन्त्रालयका अनुसार भारतमा पछिल्ला केही दिनदेखि संक्रमितको संख्यामा निकै कमी आएको छ ।
भारतमा गत जनवरी १६ देखि राष्ट्रव्यापी खोप अभियान थालनी गरिएको थियो । हालसम्म देशभर करिब २१ करोड ८० लाख डोज खोप लगाइएको छ । तर भारतका कैयौं स्थानमा खोपको अभाव देखिएको तथा खोप केन्द्रहरुमा मानिसहरुको ठूलो भिड लागेको भारतीय सञ्चार माध्यमहरुले जनाएका छन् ।
भारतले हाल १८ वर्षभन्दा बढी उमेरका व्यक्तिलाई खोप दिने नीति लिएको छ । मन्त्रालयका अनुसार, मंगलबार एकै दिन भारतमा २३ लाख ९७ हजार डोज खोप दिइएको छ ।
यसैबीच, भारतले कोभिड–१९ को परीक्षण सुविधालाई अझ सहजीकरण र व्यापक बनाएको छ । हालसम्म भारतमा ३५ करोड नमूना परीक्षण गरिएको छ । सिन्ह्वा
प्रतिक्रिया