नेपाल

थप ९३०५ जनामा कोरोना पुष्टि, एकैदिन १६८ जनाको निधन

प्रकाशित |
काठमाडौँ । नेपालमा पछिल्लो २४ घन्टामा ९३०५ जना नयाँ भेरियन्टसहितको कोरोना भाइरस (कोभिड–१९) का सङ्क्रमित थपिएको स्वास्थ्य तथा जनसङ्ख्या मन्त्रालयले जनाएको छ ।
 
योसँगै नेपालमा सक्रिय कोरोनाका बिरामी एक लाख एक हजार ६३४ पुगेका छन् । पहिलो पटक सक्रिय कोरोना सङ्क्रमितको सङ्ख्या एक लाख नाघेको हो ।  
 
मन्त्रालयका अनुसार २० हजार ३६२ जनाको पिसिआर र ४२४ जनाको एन्टिजेन परीक्षणमा ९३०५ जनामा सङ्क्रमण पुष्टि भएको हो । यसमध्ये पिसिआरबाट ९२३८ र एन्टिजेन विधिको परीक्षणका क्रममा ६७ जनामा सङ्क्रमण पुष्टि भएको जनाइएको छ ।
 
सबैभन्दा बढी काठमाडौँमा तीन हजार २५० जनामा सङ्क्रमण पुष्टि भएको छ । ललितपुरमा ४४८ र भक्तपुरमा २२६ जनामा सङ्क्रमण पुष्टि भएको छ । काठमाडौँ उपत्यकामा २४ घन्टामा कुल तीन हजार ९२४ जनामा सङ्क्रमण पुष्टि भएको हो । 
 
यसैगरी बढी सङ्क्रमण पुष्टि भएका जिल्लामध्ये रूपन्देहीमा ७७१, कैलालीमा ३३९, मोरङमा ३३६, झापामा ३००, बाँकेमा २८७, दाङमा २७७, कास्कीमा २३५ जना कोरोना सङ्क्रमित पछिल्लो २४ घन्टामा थपिएका छन् ।
  
नेपाली सेनाद्वारा गरिएको शव व्यवस्थापनको तथ्याङ्कका आधारमा कोभिड १९ सङ्क्रमणबाट गत २४ घन्टामा १६८ जनाको मृत्यु भएको छ । हालसम्म कोरोना सङ्क्रमणबाट मृत्यु हुनेको सङ्ख्या चार हजार २५२ पुगेको छ ।  
 
यस अवधिमा चार हजार ४४४ जना कोरोना भाइरसको सङ्क्रमणबाट मुक्त भएको मन्त्रालयले जनाएको छ । हालसम्म तीन लाख १६ हजार ४६८ जना सङ्क्रमण मुक्त भएका छन् । यो कुल सङ्क्रमितको ७४.९ प्रतिशत हो ।
 
सक्रिय सङ्क्रमितमध्ये काठमाडौँ उपत्यकाका तीन जिल्लामा सर्वाधिक सङ्ख्या छ । हालसम्म कोरोना भाइरसबाट सङ्क्रमितको सङ्ख्या ४ लाख २२ हजार ४१६ पुगेको छ । 
 
सक्रिय कोभिड–१९ सङ्क्रमितमध्ये एक लाख एक हजार ६३४ जना आइसोलेसनमा छन् । जसमध्ये १२४१ को आइसियूमा उपचार भइरहेको छ । भेन्टिलेटरमा राखेर २८५ जनाको उपचार भइरहेको मन्त्रालयले जनाएको छ । 
हिमालय खबर

हिमालय खबर -

थप »

यो खबर पढेर तपाईलाई कस्तो महसुस भयो ?

प्रतिक्रिया