काठमाडौँ । नेपालमा शनिबार ८४१८ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार १७ हजार ३१५ नमुनाको पिसिआर परीक्षणका क्रममा ८२८७ जना र ९८९ जनाको एन्टिजेन परीक्षण गर्दा १३१ जनामा कोरोना संक्रमण पुष्टि भएको हो ।

 

कोरोना संक्रमणबाट देशभर थप ५३ जनाको मृत्यु भएको छ । योसहित कोरोना संक्रमणबाट मृत्यु हुनेको संख्या ३६३२ पुगेको छ ,। 

यसैगरी, शनिबार ३३७० जना कोरोना संक्रमणमुक्त भएका छन् । योसँगै नेपालमा कोरोना संक्रमणमुक्त हुनेको संख्या २ लाख ९८ हजार ७६५ पुगेको छ ।

 

नेपालमा कोरोनाको सक्रिय कोरोना संक्रमितको संख्या ८३ हजार ४९३ पुगेको छ भने कुल संक्रमित ३ लाख ८५ हजार ८९० जना पुगेको स्वास्थ्य मन्त्रालयले जनाएको छ । 

 

सक्रिय संक्रमितमध्ये ७८१८ जना होम आइसोलेसनमा र ५४७५ जना संस्थागत आइसोलेसनमा रहेको मन्त्रालयले जनाएको छ । यस्तै, ७५८ जना संक्रमितको आइसियू र २३१ जनाको भेन्टिलेटरमा उपचार भइरहेको छ । ३९८ जना क्वारेन्टाइनमा रहेका छन् । 

 

काठमाडौँ उपत्यकामा ३११३ जनामा संक्रमण पुष्टि भएको छ । जसमा काठमाडौँमा २२७०, ललितपुरमा ४६२ र भक्तपुरमा ३८१ संक्रमित थपिएका छन् ।

 

यस्तै, पछिल्लो २४ घन्टामा रुपन्देहीमा ८६१, सुर्खेतमा ५९७, बाँकेमा ५५५, चितवनमा ३९२, कास्कीमा २८५, झापामा २७६, मोरङमा २५४, दाङमा १८९ जनामा कोरोना संक्रमण पुष्टि भएको छ । यस्तै, सुनसरीमा १५७, मकवानपुरमा १३४, धनुषामा ११६, बर्दियामा ११३, बैतडीमा १११ तथा पर्सा र सिन्धुलीमा १०७/१०७ जना संक्रमित थपिएको मन्त्रालयले जनाएको छ ।