चितवन । चितवन राष्ट्रिय निकुञ्जसहित देशभरका निकुञ्जमा गैँडाको संख्या वृद्धि भएको विवरण सार्वजनिक भएको छ ।
गैँडाको संख्या देशभर ७५२ पुगेकोमा चितवन निकुञ्जमा ६०५ बाट वृद्धि भई गैँडाको संख्या ६९४ पुगेको हो । राष्ट्रिय निकुञ्ज तथा वन्यजन्तु विभागले शनिबार सौराहामा पत्रकार सम्मेलनमार्फत् गैँडाको तथ्याङ्क सार्वजनिक गरेको हो ।
करिब ६ वर्षको अवधिमा चितवन निकुञ्जमा ८९ वटा गैँडा बढेका छन् । देशभर गैँडाको संख्या वृद्धि भई ७५२ पुगेको छ । सन् २०१५ को गणनामा देशभर गैँडाको संख्या ६४५ रहेको थियो । ६ वर्षको अवधिमा नेपालमा १०७ वटा गैँडा बढेका छन् ।
वन तथा वातावरण मन्त्रालयका सचिव विश्वनाथ ओलीका अनुसार चितवन निकुञ्जमा भाले १२८, पोथी १७४, लिङ्ग नछुट्टिएको ३९२ गरी ६९४ पुगेको छ ।
यस्तै, बर्दिया निकुञ्जमा भाले १४, पोथी १९, लिङ्ग नछुट्टिएको ५ गरी ३८, शुक्लाफाँटा निकुञ्जमा भाले ३, पोथी ४, लिङ्ग नछुट्टिएको १० गरी १७, पर्सा निकुञ्जमा भाले १, पोथी १ र लिङ्ग नछुट्टिएको गरी ३ वटा गैँडा भेटिएका छन् ।
बर्दियामा ६ वर्षको अवधिमा ९ वटा, शुल्लाफाँटामा ९ वटा गैँडा वृद्धि भएका छन् । पर्सा निकुञ्जमा भने गैँडाको संख्या बढेको छैन ।
सन् २०१५ मा गरिएको गणनामा चितवनमा ६०५, बर्दियामा २९, शुक्लाफाँटामा आठ र पर्सामा तीन गैँडा भेटिएका थिए । यस पटक गरिएको गणनाका क्रममा पनि पर्सा निकुञ्जमा तीनवटै गैँडा भेटिएका छन् ।
प्रतिक्रिया