मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

नेपाल   

कोरोनाको ‘नयाँ लहर’ आउन सक्ने भन्दै इटालीका प्रधानमन्त्रीद्वारा सावधानी अपनाउन आग्रह

कोरोनाको ‘नयाँ लहर’ आउन सक्ने भन्दै इटालीका प्रधानमन्त्रीद्वारा सावधानी अपनाउन आग्रह


रोम । क्रिश्चियनहरूको पवित्र पर्व इस्टरका समय कोरोना भाइरसको सङ्क्रमण फैलिनसक्ने भन्दै इटलीका प्रधानमन्त्री मारियो ड्रागीले नागरिकहरूलाई सावधानी अपनाउन आग्रह गरेका छन् ।  
 
प्रधानमन्त्री ड्रागीले आगामी ३–५ एप्रिलमा पूर्णरूपमा मुलुक बन्द गरिने घोषणा गरेका छन् । एक वर्षअघि राष्ट्रिय लकडाउन गरेको इटलीमा सङ्क्रमण फैलिँदो क्रममा रहेपछि सङ्क्रमण रोक्न फेरि संघर्ष गर्नुपरेको अधिकारीहरूले बताएका छन् । 
 
सोमवारदेखि विद्यालय, पसल र रेस्टुराँहरू इटलीको आधाभन्दा बढी क्षेत्रमा बन्द रहनेछन् । सबभन्दा बढी जनघनत्व भएका रोम र मिलानमा पनि लकडाउन गरिएको छ । मानिसहरूलाई स्वास्थ्य सेवा र अति आवश्यक काममा बाहेक घरबाहिर निस्कन प्रतिबन्ध लगाइएको छ ।
 
प्रधानमन्त्रीको कार्यालयले नयाँ प्रतिबन्ध इस्टरसम्म कायम रहने बताएका छन् । इस्टर सप्ताहान्तलाई सम्पूर्ण मुलुकलाई उच्च सतर्कतायुक्त ’रेड जोन’ बनाइनेछ ।
 
इटली युरोपमा बेलायतपछि बढि प्रभावित मुलुक हो । इटलीको मृत्युदर बेलायतको भन्दा कम भए पनि अन्य यूरोपेली मुलुकको मृत्युदरभन्दा बढी रहेको छ । यूरोपेली संघका अन्य मुलुकमा जस्तै इटलीमा खोप अभियानमा ढिलाइ भइरहेको छ ।
 
इटलीले आफ्नो मुलुकमा खोप अभाव पूर्ति गर्न भन्दै गत हप्ता दुई लाख ५० हजार अक्सफर्ड–आस्ट्राजेनेका खोप अस्ट्रेलिया निर्यात गर्नमा रोक लगाएको थियो ।
 
बुल्गेरिया, डेनमार्क र नर्वेले भने अक्सफर्ड–आस्ट्राजेनेका खोपले रगत जमाउने हल्लाबीच उक्त खोप प्रयोग रोकेका छन् । शुक्रवार विश्व स्वास्थ्य सङ्गठनले रगत जम्ने कुरा सत्य भएको कुनै सङ्केत नमिलेको भन्दै खोप प्रयोग रोक्न नहुने बताएको थियो । एएनआई