काठमाडौँ । सत्तारुढ नेपाल कम्युनिस्ट पार्टी (नेकपा) को सचिवालय बैठकमा प्रधानमन्त्री एवं अध्यक्ष केपी शर्मा ओलीले अर्का अध्यक्ष प्रचण्डले लगाएको आरोपको लिखित जवाफ दिएका छन् । 

पुष्पकमल दाहाल प्रचण्डले यसअघि प्रधानमन्त्री ओलीलाई लक्षित गर्दै १९ पानाको लामो राजनीतिक प्रतिवेदन प्रस्तुत गरेका थिए । त्यसको जवाफमा ओलीले ३८ पाना लामो प्रतिवेदन बैठकमा प्रस्तुत गरेका छन् । उनले शनिबार बालुवाटारमा बोलाइएको सचिवालय बैठकमा उक्त जवाफ पढेर सुनाए । 

गत २८ कात्तिकको बैठकमा प्रस्तुत प्रस्ताव र आरोपपत्रको खण्डन गर्दै ओलीले प्रस्तावमा महाधिवेशन आयोजना गरी नेतृत्व हस्तान्तरण गर्ने मुख्य अभिभारा भएका अन्तरिम कमिटीलाई अल्पमत र बहुमतको खेल खेल्ने थलो नबनाउन आग्रह गरे । 

ओलीले प्रतिवेदनमा भनेका छन्, ‘हाम्रो विधान र नियमावली पनि अधिवेशनसम्म हामीलाई मार्गदर्शन गर्न बनाइएका अन्तरिम प्रबन्धहरू हुन् । तत्कालीन नेकपा (एमाले) र नेकपा (माओवादी(केन्द्र) का दुई अध्यक्षले सहमतिका साथ अघि बढ्ने प्रतिबद्धता र एकीकरणका सम्पूर्ण काम सम्पन्न गर्न एकता महाधिवेशन गर्ने प्रयोजनका लागि सहमतिका साथ र मनोनयनका आधारमा बनाइएका यी कमिटीहरुलाई महाधिवेशन÷अधिवेशन आयोजना गर्ने मुख्य उद्देश्यबाट बरालिन नदिऊँ ।’

उनले भनेका छन्, ‘तीन महिनाभित्र सक्ने भनिएको सङ्गठनात्मक एकीकरणको काम सम्पन्न गर्ने काममा केन्द्रित बनौँ । विचार, विधि, सङ्गठन र नेतृत्वको प्रश्नको समाधान यथाशीघ्र एकता महाधिवेशन आयोजना गरेर त्यसैबाट खोजौँ ।’

ओलीले प्रचण्डलाई युद्धकालमा लडेका योद्धालाई बिर्सिएको बताउँदै कुर्सीका लागि म्याराथुन कुद्ने तर विगतमा योगदान गरेका साथीलाई बिर्सिएको आरोप लगाए । 

‘सरकार र पार्टी नेतृत्व दुबैबाट मलाई हटाउने म्याराथुनमा कुँदिरहँदा कहिल्यै तपाईंको दिमागमा युद्धमा घाइते भएका, अझै पनि शरीरमा गोली र छर्रा बोकेर हिँडिरहेका साथीहरुको दुखान्त तस्बिर आउँछ ? कहिल्यै यी साथीहरुलाई राहत र पुनःस्थापनाको विषय एजेण्डा बनाउनु भएको छ ?’, उनले उल्लेख गरेका छन् । 

प्रधानमन्त्री ओलीले नातावाद र राजनीतिक नियुक्तिका विषयमा उठाएको प्रश्नमा पनि प्रचण्डलाई एकान्तमा बसेर आफैँलाई हेर्न सुझाव दिएका छन् ।  

‘मलाई नातावादको निराधार आरोप लगाउनुपूर्व तपाईंले एकचोटि आफैँलाई नियालेर हेर्नु भएको भए हुन्थ्यो’,तपाईंले गर्नुभएको सिफारिसमा आन्दोलनमा योगदान र त्याग गरेका मान्छे परेका छन् किन अन्य ? न्यूनतम मानवीय सम्बन्ध र मर्यादालाई ध्यानमा राखेर तपाईंले मसँग उम्मेदवारी, मन्त्रिपरिषद् या राजनीतिक नियुक्तिमा भन्नुभएका सबै विषय अहिले सार्वजनिक गर्दिनँ । आज मात्र होइन, भोलि पनि मबाट यस्तो काम हुने छैन । तर तपाईंले एकछिन एकान्तमा बसेर, आफैतिर नियालेर हेर्नुस् त, हिजो कष्टपूर्ण यात्रामा साथ दिएका साथीहरुमाथि साँच्चै न्याय भइरहेको छ ?’